Dilip Kumar tang tajungba lir

April 16, 2016 : Temang arongba aser teko nung timtem adokba ajanga Bollywood film actor tejen Dilip Kumar Hokolbar aonung Lilavati hospital nung yaria liasü. Pa ICU nung khen danga mayu aser tajungba kümdar, ta Honibarnü pa kinungtsü Saira Banu-i ashi.
“April 15, 2016 aonung Dilip Kumar teko nung timtem adoka temang arongba ajanga Lilavati mozü kidang anir oa yaria liasü,” ta kinungtsüi Dilip indang official twitter account ajanga metetdakja liasü.
Pa kara jungdaktsütsü atema tezü nung antibiotics ajem tutsü. Mozü achiba ajanga tezü nung ajem atuba amabo temang nung kara teyari magütsür ta doctor temi ashi. Pa kidang masü saka mozükidang yariang tajungba asütsüsa mapang agi bentsür aruba ajanga mozü kidangi anir ao.
Tsüngrem temeim aser taochi adenba den doctor temi kanga junga anepalua yariba ajanga pa tang kümzüka aser tajungba lir.
Olulu prokshiba ama pa ICU nung masü saka mozükidang takdang ka nung lir, ta sangdong ka ajanga metetdaktsü.
Arishi küm 94 tain, Dilip Kumar ya ICU nung masü saka mozüki takdang ka nung lir, ta Dr Parkar-ia metetdaktsüogo.
Osang ka ajanga ashiba agi, pa Honibar aonung mesüra Deobar anepdang mozü kidang nungi kidangi yoktsü.
Pa tasodang jatsüba tenüng chichibabo Mohammad Yusuf Khan lir ajisüaka film industry nung pa tenüng Dilip Kumar ta amshir.
Pa küm 60 shi Bollywood nung shilem agiba mapang Madhumati, Devdas, Mughal-e-Azam, Ganga Jamuna, Ram Aur Shyam aser Karma film tem nung shilem agia lir.