Dilip Kumar ya film industry nung asen tongshi: SRK

December 16, 2015: Actor Shah Rukh Khan-i teti actor tain Dilip Kumar nükshia aruogo aser pai Kumar ya Bollywood film industry tashi itdaktsüba tongshi ka ta züngshir.

Arishi küm 50 “Happy New Year” actor SRK-i Kumar dang “icon” ajabajia ilara ta ashiba den külemi Kumar nem Padma Vibhushan award agütsüba atema benjung tulu akatsüla, ta ashi.

Mumbai nung osangbenertem den jembidang SRK-i, “Ajak dang nungi Dilip sahab tetemsüba. ‘Icon’ olongji-a pa atema ilara. Film industry nung pa ya tebuti ka aser tongshi ka. Tongshi ishika anünga aliba rongnung pa lir. Pai agizükba sempetji tulu ta ni amanger,” ta ashi.

“Pai award kwi agizükdir agizükaka, ibaji pa atema ishika dang asütsü. Actor dak alia pa ya nisung tajung rongnung ka lir. Ni parnok junga meteta aliba yong ni ibaji shiteter. Iba ya pelateptsü mapang ka lir,” ta paisa shisem.

Tawa Kumar nem Union Home Minister Rajnath-i par ki semdanga pa nem Padma Vibhushan award agüja liasü.

Singh-i arishi küm 93 Kumar nem medal ka, certificate ka aser tabenba sü ka agütsü.

Film industry nung küm 60 tsüngda pai “Andaz”, “Aan”, “Devdas” aser “Mughal-e-Azam”ama film tem nung shilem agiogo.

Pa dang ‘tragedy king of Bollywood’ taka ajar aser pai “Kranti”, “Shakti”, “Karma” aser “Saudagar” film tem nunga shilem agiogo. Pai shilem agiba tesütiba film ji 1998 küm “Qila” film liasü.