Dilong nung alir dang lendong mapang langzütsü tesayuba agütsü

Mokokchung HG & CD Commandant, Watilemba den par külem department nungi ketdangsürtem den SDRF jawan-tem aser Dilong yimden pur külemi telok noksa tangokba angur. Mokokchung, November 15, 2016.

Mokokchung, Nov 15 (TYO): Alima yimya lendong tapu balala atalokba mapang taküm kümzükba den tangar yaritsü meteta alitsü asoshi tesayuba sentong tajung ka
Home Guards & Civil Defense (HG&CD) Mokokchung ajanga ayongzüka Dilong Community Hall Mokokchung nung katsüogo.
Iba sentong nung Dilong ward Mokokchung kübok yimdeni anir telok balala nungi ketdangsertem densema liasü. Mokokchung HG&CD Commandant, Wb. Watilemba lenisüba nung par külem ketdangsürtem den Dilong ward yimden aser SDRF jawans-temi yaritepa sentong takok ngua ayongzüka liasü.
Iba tesayuba sentong nung tongtibangsa; yirudang bandage alepba, tangu mesashiteti süja or alidang shia arudaktsüba yimya, tangu sashiba lenmang nembanger alidang anepaluba tasa, tekolak/terongtong yirudang anepalubayim, tetsüng-tepen yirudang alenba yimya, lendong nungi kümzükba tasa balala aser sangzü alenba yimyatem mapa dena ia sayua liasü.
Yimya agi teburtembo kidang kangabo mamener, kidangji teimba tetsür dang alir, anungji, lendong balala atalokdang langzüba tasa sayuba ya teburtemi dang masü saka tetsürtemia junga angazüktsüla, ta Dilong Ward chairman, Wb. I Tia Soyah-i iba sentong nung jembidang ashi.
Iba ama tesayuba tajung katsüba asoshi Mokokchung HG & CD danga pelaba paisa lemsatep. ‘Nübur rongnung iba ama tasa angazüka aliba ajanga ajungben lendong balala atalokba mapang, pei taküm kümzükba den kidang-kiyonger dena yaritettsü imlar’, ta paisa shisem.
Mapang shia Home Guards & Civil Defense (HG&CD) Mokokchung ajanga school, college aser nüburtem nem iba ama alima lendong balala atalokdang langzütsü asoshi tesayuba balala agüja arudaki aser iba ama tesayuba ya nüngdakba pur nem agütsür.