Dilong ward nung candidate atema common platform agi

Mokokchung, March 30 (TYO): Dilong Ward Mokokchung yimdeni ayongzüka March 30 nü 26 Aonglenden Assembly Constituency By-election nung tokteptsüpur candidate-tem asoshi arok sabang (common platform) declaration sentong ka Dilong Community hall nung kaogo.
Iba arok sabang akatsüba ya 2016 küm Dilong Ward pur lokti senden nung lemtet aser 2018 state general election nungi tenzüka mapa küma arur aser taküm agi kümnabuba ayongzüka akar.
Iba sentong nung Nationalist Democratic Progressive Party (NDPP) candidate Sharingain-i jembidang, nübur tenzüktsü aser talisa tanü ya lanur putu asünung lanurtem atema noktaker, ta ashi.
26 Aonglenden ya nüngtugu Assembly Constituency ka lir, anungji, “iba constituency nungi lanurtem aser tarutsü putu asoshi temelenshiji tenzükdaktsütsü tejangraba lir”, ta ashi.
Teinyaktsü aika lir, anungji, pa nem maongka agütsüra, “lanurtemji asüng atema lir, anungji, meimchir dak aketba sempet (human resource) aser tongtibang nüngdakbatem renlokdaktsüba (infrastructure development) nung temulung agütsütsü”, ta pai shisem.
Indian National Congress candidate Alem Jongshii jembidang, tanü state nung Congress MLA kada meliaka, pai Congress party kanga meimba agi iba party nungi tokteper, ta ashi.
India nung party tongtibang ana lir, ibaji ka BJP aser kaji INC. BJP yabo telok ka dak dang rangloker inyakba “communal party” ka lir, saka INC ya ang shitakba arok atema inyakba (secular) party ka lir aser iba ya ang asenok asoshi tapet party ka lir, ta ashi.
Pa nem nüburtemi maongka agütsüra, pai tongtibang agüja inyaktsü atema tebilemba kar lemsatepdang, anema aliba (health care) tsütsü, education tsütsü, tanü lanurtem mapa manguba tebilemtsü ajemdaktsütsü atema skill development, rongsenkettsüng renlokba aser infrastructure tsütsü temulung agüja inyaktsü, ta ashi. Ajak dak alia loktiliba lirumedem/süsümedem “social harmony” atema inyaktsü, ta paisa shisem.
Dilong Ward chairman, Tia Soyah-i mapang tatsüka agidang, tanü nungi tenzüka Dilong ward telungtet nung telok anaprong nem nübu ayimtsü asoshi kishi sadema lapoktsür, ta metetdaktsü. Aji saka, nübu yima jajaba mapang telok shiangaia kiyonger nem timtem magütsütsüla, shir teloki aibelendir yimdeni tai matoktsü, ta tekümdangtsü o ka shisem.
Candidate shiba adokdir adokaka, terenlok mapa balala inyaka aodangji tejak mereprangi nübur arok ajangzüktsüsa inyakdaktsünür, ta paisa mepishia ashi.