‘Dilwale’ film ajanga tang tashi nung sen crore 121 attetogo

December 21, 2015: Taoba hopta sayaba “Dilwale” aser “Bajirao Mastani” nati box office nung sen kanga toktepa aatar, ajisüaka “Bajirao Mastani” film-i “Dilwale” ajanga aatetba ano memenep. Shah Rukh Khan-i shilem agiba film ajanga tang tashi nung sen crore 121 aateta lir aser Ranveer Singh o Deepika Padukone nati tongti shilem agiba “Bajirao Mastani” film ajanga anogo asemnü nung sen crore 46.77 aateta lir.

Rohit Shetty-i direct asüba “Dilwale” film sayar tang tashi nung India nung sen crore 65.09 aser bendang linük nungi sen crore 56 aatetba ajanga ajak agi sen crore 121 aatet lir. Film anaprongla ya tesüiba Hokolbarnü saya liasü.

Shah Rukh, Kajol, Varun Dhawan aser Kriti Sanon nungeri tongti shilem agiba “Dilwale” film atema bendang linüktem nungia kanga temulung asüba shiogo, ta trade analyst Komal Nahta-i ashi.

“Tesüiba hopta tatemlen Bollywood indang Dilwale film ajanga Gulf tesem nung ‘Star Wars: The Force Awakens’ film dang nungia timba aatet,” ta Nahta-i twitter ajanga metetdaktsü.

“Britain, Malaysia aser Australia nung SRK-i shilem agiba film rongnung nung 2015 küm asoshi Bollywood film Diwale ajanga danga film dang nungi timba aatsüogo. Zealand box office nung tanabuba jenjang nung lir aser US nung film tajungtiba 10 rongnung jenjang toku (9) buba nung lir,” ta pai ashi.

“Bajirao Mastani” ajanga kanga temulung süa aatar aser nüburtemi film ajungba indang kanga jembir,” ta trade analyst Taran Adarsh-i ashi.

“#BajiraoMastani-i maneni kanga junga aatar. Hokolbarnü sen crore 12.80, Honibarnü sen crore 15.52 aser Deobarnü sen crore 18.45 ta aateta ajak senteper sen crore 46.77 aatetogo,” ta Adarsh-i twitter ajanga metetdaktsü.

“Bajirao Mastani” sayanü India nung screen 3,050 nung sayu aser iba nü kjia nung sen crore 12.80 aatet. Dilwale film sayanü screen 2,700 nung sayua liasü, ta osang kar ajanga ashi.

Film anaprongla ya sen crore 100 entoka yangluba film tem lir anungji taruba hopta tem nung aabaji kanga tongtibang asütsü.

Tan Kristmas aser January 1 nü “Dilwale” aser “Bajirao Mastani” film na den tokteper mali anungji sen aatsü asoshi mapang peria angutsü.