Dilwale film-i Bajirao Mastani den sen timba aazüker

New Delhi, December 19 (Agencies): ‘Bajirao Mastani’ aser ‘Dilwalwe’ film na India nung kasa anogo, yashi Brehostibar nü saya saka film mezüngsüa sayaba anogo nung Dilwale film-i sen timba aazükogo.

Sanjay Leela Bhansali’er Bajirao Mastani film-i yashi sen crore 12.8 tashi aazük saka Rohit Shetty’er Dilwale film-i yashi anogo kisüng nung sen crore 21 tashi aazükba osang jangjaogo.

Box Office India-i ashiba agi, film mezüngsüa sayadak nisung noklang shilem nung shilem 65-i Dilwale film reprang saka Bajirao Mastani film-bo nisung shilem 30 shi dang reprangba osang bushitetogo.

Bajirao Mastani film nung Ranveer Singh-i Maratha lenisang, Peshwa Bajirao I ama shilem agir aser Deepika Padukone-i Bajirao kinüngtsü, chubatsür Mastani ama shilem agia lir.

Kasa film nung Priyanka Chopra-i Bajirao’er mezüngbuba kinüngtsü, Kashibai ama shilem agiogo.

“Tamangba yimsü ajungai temeim indang tesayuba agütsür saka temeimbo tamangba yimsü kati danga alena mali ta jungkai adoka sayuba Bajirao Mastani film ya film tajun ka lir,” ta India nunger film tetendanger mongin, Saibal Chatterjee-ia metetdaktsüogo.

“Shah Rukh Khan aser Kajol nati tongti shilem agiba Dilwale film ya temeim otsü balaka lir,” ta pai shisem.