Dima Hasao nung Naga telungpurtemi yimdaklir amokmeren

Silchar, December 6 (Agencies) : Nagaland nungi telungpur telok kari Assam kübok Dima Hasao district nung aliba Leike yimdaklirtem dang yim toktsür aotsü tetuyuba agütsü aser iba amokmeren ajanga Kuki nunger timba ser aliba tesem nung tensa mejungi kümogo.
Haflong nung Assam Rifles otongdar kati ashiba agi, NSCN züngsemtem ta temulung melemi bilemertemi Assam nung aliba hill district nung yimjung raksatsütsü meranger.
Leike nung Kuki nunger yimtsüngji anameta aliba Naga nunger yimtsüngtem teyari agia kümtetshitsü meranger. Assam Rifles-i Dima Hasao nung yimjung bener arutsü atema inyaker, aser lokti nung telok balala tsüngda tesentaktep tajungba küma aliba mapang ka nung Assam state adena orr aliba telungpurtemi tensa raksatsütsü meranger, ta AR otongdarisa metetdaktsü.
Yimjung tenangzüktep aser yimjung atema mapa inyakba hau ta melii taoba hopta tu Nagaland nungi telungpurtemi yimdaklirtem amokmeren aser parnok dang Leike yimtsüng toktsür aotsü tetuyuba agütsü. Iba ya ajanga telungpur teloki ozüng alema mapa inyakba anenogo, ta ashiba aser Centre den yimjung tenangzüktep agitsü maparen inyakba magizükba sayur, ta AR otongdarisa shisem.
Kin o kin azütokshitepa raraba ajanga 1994 küm nisungtemi Leike yimtsüng toktsür aotsüsa tensa ajuru aser küm 20 shi lir külen tang parnok tanaben kidangi meyipa arur. Telungpurtemi amokmerenba ya Dima Hasao nung Naga aser Kuki lennirtemia aitsüogo, ta otongdarisa ashi.