Dima Hasao nungertem Republic Day mangyim nung mungogo

Haflong, January 26 (Agencies): Linük nung tesem ajak nung kanga dang mera keta Republic Day amongba anogo ka nung, yashi Maibong tesem nung police temi parngbong agi akhaba lendong nung nisung ana asüba aser aika yiruba ajanga Dima Hasao nungertem mangyim nung iba anogo süidaktsüogo. District Administration iba maparen inyakba anema parnoki Republic Day benjungmung parnok tesem nung amongtsü asoshi memela aser Aenjeti 26 anepdang 5:00 ako nungi Aenjeti 28 anepdang 5:00 tashi parnok aliba tesem ajak mokdanga ayutsü sentong ka ayongzükogo.
Parnoki tezüluba nung takhangba asem agütsü: Mezüngbubaji Dima Hasao dak sendakba nung Nagalim ken o sorkari tezüluba nung agütsütsü asoshi akhang. Tanabuba nung Haflong, Dima Hasao, Assam Deputy Commissioner aser Superintendent of police tangsa dang mapa nungi anentsütsü asoshi akhang. Tasembuba nung yirur alirtem ajak nem senotsü teyari agütsütsü asoshi akhang.
Temetettsükaji iba tatalokba nung police temi Yangtepnü Maibong railway station nung longkak aitertem senshidaktsütsü asoshi injang akhaba nung nisung teko yiru aser ana tashi asü. Maneni iba lendong ajanga train nung senzür parnok 3,000 shi taolen makai kümdaktsü. Asüsang ana ya Mithun Dibragede aser Prabanta Hakmosa, ta jangjaogo.
Iba tatalokba ya Dima Hasao lokti tentet ajaki aitsüogo.
Osangbenertem den jembidang Assam Police, DGP, Mukesh Sahay-i ashiba agi, tensa tang tajungba lir aser police temi kechiba injang agi akha iba ken o ya tang bushisüngdangdar. Assam DGP-ia asürtem aser yirurtem ya police temi akhaba ajanga lir ta nangzükogo. Paisa maneni sorkari asür kibongtem nem teyari sen lakh pongungu agütsütsüba aser yirur alirtem angati agi temang anepalutsütsü mulungogo, ta metetdaktsü.
Iba lendong dak sendakba nung tesem ajaklen nungi police tem kanga mejungi aitsüogo aser aikati rubber bullets mesera tear gas nunger amala mamshi kechiba police temi injang shidakba amshir, ta asüngdanga liasü. Nüburtemi social media balala nung iba tatalokba aitsüba den asürtem atema temeden khanga liasü.
Osangbenertem den jembidang Dimasa Students Union, Advisor, Amal Daolagajao-i ashiba agi, “Maibang tesem nung aliba kecha tai maketba nisungtem Jagdamba Mall-i Framework agreement dak sendakba nung Dima Hasao district, Assam kübok Naga nungertem nem development authority balaka agütsütsüba osang sangdongba anema süngjem süngjema longkak aita liasü, ajisüaka DC-i sepaitem dang tear gas mesera rubber bullets amshitsü melena longkak aitertem dak injang shidakba agi akhatsü asoshi tetuyuba agütsü.” Paisa ashiba agi tasürtem ya kecha jenjang agi malizüktettsü.
Iba dak sendakba ken o nung Dima Hasao District Congress Committee tir Nirmal Langthasa-i ashiba agi, “Naga Framework agreement dak sendakba nung nüburtem kanga tang mangmangtepa aliba tensa ka nung ‘The Wire’ nung sangdongba ocet ajanga Dima Hasao nungertem mesüngjemteti kümdaktsü. Nüburtem sorkari mesüshiba ajanga laktetogo aser iba amala tasa ya ojang dang amshitsüla. Nüburtemi iba tezüngzüktepba nung keta aliba onüktem jangjaner aser iba nung ozü li densema ali asü maliar jangjaner. Nisung taküm ana laluba ya onok asoshi kanga dang tejashitsü tatalokba ka lir.”
Paisa ashiba agi, “Onok Naga nunger ken o anema nokdaker masü aser onoki parnok mapang talangka kangshia aruba jangjaa meteta lir. Onokia iba ken o ya tekarariba nung bentetdaktsüner, saka iba ken o bentetba mapang nung onok artsü nung kongshiabo ken o kecha tembanga mejembitsüla.”