Dimapur Ao Baptist Arogo lanurtemi azü tenlatsü

Dimapur, July 03 (TYO) : Tang nungibo Dimapur nung azü nüngdaka shirangertem asoshi temulung anisüngzüktsü osang kaji Dimapur Ao Baptist Arogo (DABA) nung lanurtemi azü tenla agütsütsü sentong ka tenzükogo.
Iba osang ya tanü Deobar nü ABAM lanurtem anogomong amongba sentep sentong nung DABA nung Youth Director Wb.Toshi Longkumeri metetdaktsü. Iba sülen DABA sannükertem ajaki külemi sarasademja iba sentong ya tenzükogo.
Tanü tashi nung medical scientist-temi meyanglutetbaji nisung zü ya ka lir, iba jagi azü nüngdakba purtem asoshi azü tenla agütsür kanga nüngdaker. Iba nüngdakji angateta DABA lanurtemi azü nüngdaka shirangertem tonga oagi azü tenla agütsüba den külemi sarasadem mapang tajung agitsü sentong ka tenzüker ta DABA lanur lenirtemi metetdaktsü. Azü agütsüba ajanga temang nung kecha timtem magütsür saka azü tasen dang renloker aser azü tenla agütsütsü tendang dang pei temang nung tashidak ali mali putetter, ibaji kanga tajangzük lir ta parnokisa ashi.
DABA lanurtem nungi azü aginürtemi mobile phone number 9856003553 ajanga mesüra DABA Youth Ministry nung lenirtem den tongteprateptsü akoktsü.