Dimapur Arogoi lanurtem dang mapa sayur

Dimapur, Luroi/August 23 (TYO): Dimapur Ao Baptist Arogo (DABA) ajanga lanurtem nem mapa bushia inyakdaktsütsü nükjidong nung Emporium Training & Consultancy Private Ltd telok den tanü tangatettep ken o (Memorandum of Understanding) ka renemogo.
Emporium Training & Consultancy Private Ltd telok ya Kolkatta nungi Companies Act, 1956 nung register süa aliba telok ka lir aser parnoki Ministry of Skill Development, Govt of India teyari agia tayimtsü nung aser hotel tulu tajung nung mapa inyaktsü sayur.
Tanü DABA aser Emporium telok na tsüngda tangatettep ken o renemba ajanga ashiba agi, Emporium teloki tesayurtem tajung bushia bener arua tayimtsü aser hotel tulu nung inyaktsü tesayuba Dimapur nung agütsüba dang masü saka training temli mapa agütsütsü. Ano külen DABA-i training agirtem asoshi taa agütsütsü aser parnok training agiba maparentem repranga anidaktsü. Anungji, training agirtem asoshi ibai pei kidang nungi angati mapa inyak angazüker mapa tajung anguba lenmang tajung ka asütsü.
Iba sentong nung mezüngbuba telokbo joko yakta training tenzüktsü alinungji, tan Hombar August 27, 2018 anogo tashi nung nisung shimtsü lateta lir, anungji DABA nung lanurtem küm 18 nungi 27 tashi purtem rongnung shirnoki item mapa inyaktsü jangrar, tang Honibar August 25 tashi nung tenüng agüjang, ta DABA nung Member Care ministry ketdangser Rev. Lima Jamir-i tanü nenshia metetdaktsüogo.
Tang mezüng training agidaktsütsü atema nisung 30 dang shimtsü, aser tang tashi nung nisung metsü tenüng agüja lir, anungji tejangrartemi tan hopta tsüngdasa tenüng agütsütsüla ta paisa mepishia metetdaktsü. Ajisüaka, iba mapa ya asen lima nung masü saka tanga state-tem nung inyaktsü alinungji, tamasayongi bendang lima nung mapa inyaktsü mulunga alirtemang tenüng agütsütsüla ta parnokisa metetdaktsü.
Tanü iba sentong nung jembidang, DABA nung Associate Pastor aser Member Care ketdangser, Rev.Limai ashiba agi, Arogo nung lanurtem dang mapa inyak sayutsü asoshi küm pezü jakdang iba Member Care sentong ya tenzük aser küm shia lanur tejangrartem dang Electrician, Plumber, beauty & wellness, mason, tailoring, aser excavator operator mapatem sayua arur aser taküm nungi Emporium telok den ya mapa tasen ana tenzüker.
Iba kasa sentong nung Emporium Training & Consultancy Private Ltd nung Operation Manager, Anirban Mukherjee-ia jembia liasü.
Tanü telok ana tsüngda lanurtem dang mapa sayutsü asoshi tangatettep ken o renemba ya küm asem atema asütsü.