Dimapur asen lima

Nagaland nung alir Naga nungertem nem moatsüba temoatsütem rongnung tulutiba kaji Dimapur ya lir. Dimapur ya Nagaland kübok mali asübo, Naga nunger sadema ayangdak aser alidak mekala ta bilemer. Atangji, Naga nungertem ya tenem nung aliba kin, anungji alemli nungi Naga nungertemi lenden lima nung alitsü mejangrar. Alima yimya agi tenem nung apokba tzü aser tenem nung aonba mopong tajungba, ibaji dang masü saka tenemlen dang nungibo lendenlen tatsükba asünungji merila den tashidak aika poktetter. Ano, Naga nunger asoshi lenden nung alitsübaji tarendaktsüka liasü, kechiyong asenok ya lepteptsüngtepba kin, anungji lenden nung nok-nü kija amshia rara dang tejenokdak junga mengutet südi. Ibayongji, Naga nungertem asoshi Tsüngremibo lenden lima molutzü tashi moaja liaka, Naga nungertemi lenden lima anü tatsük tizükteta sobalibaa lia moutetba agi lendenden tesem aika nung tangar bendangertem lidaktsü aser parnok dang nungi alimelen dang agia aru. Tanübo item Naga nunger litemji Naga nunger nem alimenlen agütsürtem meyong kümogo. Atangji, Dimapur nung ya Kachari chuba arua yimsü süa aliba otsü aser mongjen tanü tashi lir. Aji oda, tanü tashi Kachari nungertema Dimapur nung Naga nunger den kasasa senso temeten angur, anungji parnokji Nagaland nung Naga nunger den kasasa senso tajungtem lir. Ashiko, iba ama akhi tejen otsü nung ajemdaker, kin kari Dimapur ya parnok meyonga ta bilema alitsüa akok. Ajisüaka, tangatettsü kaji tanü tashi Nagaland o Assam na teti asoshi artsü ladanga maka. Nagaland state mangudang tanü aliba Nagaland tesadangka Assam kübok liasü. Kodang Nagaland state angu, artsü ladangtsüba ken o matem yutsür Nagaland state mesemteta ao. Iba jagi tanü tashi state anaprongla kangshir. Angazükba agi, Nagaland state akümba mapang Karbi nungertema Nagaland state nung dena liasü saka mapangi memelaba agi parnok manioktet. Aji oda, mapang kabo Nagaland tesadangka Assam nung aliba otsü agi Naga nunger lushiji Assam nunger meyong mekümtet. Atangji, Dimapur ta asüba tenüngji Naga nunger oshi masü saka bendanger oshi, iba jagi bendanger kin kari Dimapurji par tenüng aser par lima asütsüla ta akanger. Ajisüaka, iba kisüng jagia Dimapur-ji Naga nunger lushi masü mekümtettsü. Iba ama jembiba jagi Naga nungertemi khenkhenbo Dimapur tenüng ya Naga nunger oshi agi melentsü merangdanger. Iba jagi taoba hopta nung asenoki ” Dimapur tenüng ya Naga nunger oshi agi melen nunga koma süla ?” ta bilemdangogo. Ajisüaka, kari ashi ama, tenüng melenba jagi Dimapur otsü memelentettsü aser tenüng melenba kisüng agia Dimapur tajungba makümtsü. Otsü aika liaka, Dimapur ya Nagaland nung tongtibangtiba yimti ka kümadokogo, anungji Dimapur ya Naga nungertem meyongsa asütsü atemabo Naga nungertemi Dimapur ya meima anepalutsüla. Tang tashibo Dimapur-i asenok moatsüba dak alaka asenoki Dimapur asoshi kecha tajung inyaka mali. Asenoki Dimapur topur ajungtsüsa inyaktsü melen lenmang lendi dena atsünga agir, motzü aoba kilentzü aser ayongnu ajak nembanger ki asür. Yimdong tiyong nung jana tokdentsür aser tanurtem asoshi asayadak moapua dena tilakata meyutsüi atsüngsepa agir. Tang tashibo asenoki Dimapur asoshi bilembaji akok tashi ali alir ki yanglua senotsü ajangzüktsü dang bilemer. Iba jagi Dimapur renlokbaji tanga kecha nunga masü saka kiojen yangluba nung renloker. Ajia junger saka ki teimba aküm dang, lenmang lendi tilaba kümra, light junga maruba maruba kümra, tzü agi tanüngba tanüngba kümra, kaketreju dena tamenokdak maka kümra, Dimapur ya memerükba memerükba kümra aser tayokertem ajak tangar aser talir ajak asenok dang ta kümra, kenlirbo Dimapur ya asen meyonga mesünütsüsa kümadoktsü. Joko, tang yabo asenokia Nagaland asoshi kechi tajung inyaktsü ta bilemba mapang asütsüla. Iba amaji, Dimapur nung alirtemia Dimapur asoshi kechi tajung inyaktsü ta bilema inyakba mapang asütsüla. Idangji dang asenoki Dimapur madak kibur kümchila kümtettsü.