Dimapur, Chumoukedima aser Niuland DPDB teloktep senden amen

Dimapur, Rongchii/April 22 (TYO): Dimapur, Chumoukedima aser Niuland district tem indang District Planning and Development Board senden ka April 22, 2022 nü Land Resource Centre, Ruzaphema nung mena liasü.

Iba senden nung Deputy Commissioner aser Vice Chairmar, DPDB Dimapur, Rajesh Soundararajan IAS menden liasü aser Advisor & Chairman DPDB Dimapur, Zhaleo Rio ajanga sentong tenzüka jembia liasü.

Iba senden nung Dimapur nungi legislator pungoprong arua dena liasü aser o tatsütsü jembi.

Tajungba nung ketdangsütsü nükjidong nung Dimapur nungi district tasen ana, Chumoukedima aser Niuland district kumtetba asoshi legislator pungoprong lungjemer sorkar dang pelaba lemsatepa liasü.

District tasentem nung nüburtemi timtem ajuruba nung lenmang sayutsü aser yariteptsü atema legislator temi ketdangsürtem ajungshi.

Kasa mapang Commissioner of Police, Dimapur, Rothihu Tetseo ajanga lokti dang Dimapur nung tzüzüng ozüng tensa indang tongmelang agi metetdaktsü aser tesunep nung lir, ta ashi.

Commissioner of Police ajanga, lenmang temesüh aser lenmang nung gari lendong ajuruba ya tebilemtsü tulutiba ta ashi aser iba atema district nung CCTV camera tali agütsütsüla, ta legislature tem dang ajungshia liasü.

Deputy Commissioner, Chumoukedima, Abhinav Shivam ajanga o tatsüka jembiba mapang, Dimapur, Chumoukedima aser Niuland district tem ya Nagaland indang tanüdangtsü ka amai lir, anungji lenla ajaklen terenlok alitsü nüngdaker, ta ashi.

Iba senden nung Logos School tenüng Footprints Academy dangi melentsü, Pillar School Diphupar A village nungi Seithekima A village nung Amazing Grace Mission Center aser Dohron Kids Academy tenüng nung school tasen lapoktsü indang jembia liasü.

Senden nung school tem upgrade asütsü indang jembia liasü, aser itemji Govt. High School Lingrijan nungi Govt. Hr. Sec School Lingrijan akumtsü, Ebenezer Public School, Sewak Lotha colony, NN Nagi School, Kuda village A- khel, GPS Ikishe Dimapur nungi GHS aser Molvon nungi Government Higher Secondary School Dimapur alitsü.

NOC agütsüra Nagarjan Road ya Nimedo Sakhrie Road kumdaktsütsü asoshi senden nung agizüka ayu.

Ken o tatsü talang ajak jembiba sülen Mobile Dispensary Medical outreach service centre amenoktsü senden nung agizüka liasü.

Senden nung Co- Educational Institute Berachah MPCS LTD amenoktsü atema molungtep saka verification report agütsütsüla, ta jembia liasü.

Maneni Children’s Hope Library, Dimapur District Welfare Society, Deaf Community of Nagaland, Naharbari Dimapur aser Hemophilia Society Nagaland Chapter, Ayimti Sector B Dimapur amala society registration indanga jembia temaba ketdangsür dangi abentsü lemteta liasü.