Dimapur College nung süngküm ana semzük

Dimapur, July 25 (TYO):  Dimapur Government College nung otsüsütsüsa tanü Hombar nü süngküm (gate) ana semzükogo. Iba süngküm anaprongla ya sen lakh tenet shi agi tamalen Dimapur College nung azünger telongjem Alumni Association purtemi yanglutsüba liasü.
Süngküm ana rongnung, anülulen aliba süngküm Higher Education nung Additional Director, Wt.Kuholi Chishi-i semzüktsü aser anüdoklen aliba süngküm Dimapur Govt. College nung principal, Wb.Akok Walling-i semzüktsü. Wt. Kuholi ya taküm küm tetenzüklen tashi Dimapur Govt. College nung principal inyaka liasü.
Dimapur Govt. College purtem asoshi July 25 nü ya College tenzükba anogo liasü aser iba denji külemi taküm 2016 küm ya College tenzüker küm 50 ajungba jubilee amonger. Ibayongji, süngküm ana ya Alumni Association purtemi Jubilee tenüng nung yanglutsüba liasü aser College tenzükba anogo nung iba süngküm anaji semzükdaktsüogo.
Tanü iba sentong nung jembidang, “Küm 50 jakdang tarutsü lanurtem bilema iba college tenzüktsürtem nem akümtsübu agüja bilemtetba anogoji tanü ya asütsü,” ta Kuholi-i metetdaktsü.
Item lenirtem tsüngsü nung tanü iba college nung züngtetter alumni purtemi mapa tajung inyaka anidakba asoshi kanga pelar, ta laisa ashi.
“Nenoki iba shisatsü angazükdak süngküm ajanga oli aruli ta senzüdang, ano tali meranga inyaktsü aser Tsüngrem dak tamang akatsü bilemtetang. Junga azüngerbo mapa mangu masür, iba amaji tanü Alumni purtem jilu ajizüka alima nung temelenshi tajung bener arutsür kaka asütsü merangang,” ta taoba DGC principal aser tang Higher Education nung Additional Director, Wr.Kuholi-isa metetdaktsü.
Laisa  Alumni Association purtem den külem ser college asoshi mapa tajung inyaka aotsü Higher Education-i bilema alitsü ta metetdaktsü.
Tanü iba süngküm semzükba sentong ya Alumni Association, DGC nung Tir, Wb.A.yanger Jamir-i len ani aser iba sülen College Auditorium nung College tenzükba sentong agia liasü.
Iba sentong nung tepela o College Principal, Wb.Akok Walling-i jembi aser süngküm yangluba osang tatsüka Construction Committee nung tayonger, Wb.K.Temjen Jamir-i agütsü. Iba sentong nungsa Alumni tenüng nung P.Bendang Jamir-i jembi aser DGC Jubilee Planning Committee nung tayonger, Wb.Khrieo Rutsa-i college indang osang tatsüka metetdaktsü. Iba sentong tatemsa tenüngsang o DGC Students’ Council nung tongti zülur, Wb.Limaaküm-i jembi aser tesayur Dr.Jamedi Longkumer-i sarasadema sentong atem.
Iba sentong nung kaketshirtemi kentenmenü shilem tapu balala agia liasü.