Dimapur college nung züngtettertemi ayongzüker

Dimapur, Sept.30 (TYO) : Dimapur College tenzüker küm 50 ajungba jubilee mong sangküm 2016 küm amongtsü aser iba tenüng nung tamalen Dimapur College nung azüngertem telongjem, Dimapur Government College Alumni Association purtemi college gate ka kanga junga yanglutsütsü aser ano iba denji kaketshirtem anisüngzükdak semtu (waiting shed) ka den college canteen ka yanglutsütsü lemtetogo.

Item mapatemji akhidang iba college nung azünger aser teyaritepertem tenla bentepa inyak tenzükogo aser sangküm küm matongdangsa renemtsü merangtsü ta DGC Alumni Assocaition sangdong ka ajanga metetdaktsüogo.

Anungji, tetenzük dang nungi tang tashi nung Dimapur college nung azüngertemi akok tashi item mapa asoshi tenla den pei züngsem saru agütsüdaktsüner ta DGC Alumni Association nung tir Wb, A.Yanger Jamiri mepishia metetdaktsüogo.

Item tenla aser saruji DGC Alumni Association nung tongti ketdangpurtem nem mesüra College nung tesayur Sedevino nem college lapoka aliba mapang agütsüdaktsüner ta paisa mepishia metetdaktsü.

Tawaka tashi Dimapur nung college tanga kata mali Dimapur Private college ya dang liasü aser tanüa Dimapur nung government college-bo Dimapur Govt. College ya dang lir.