Dimapur: COVID-19 putetba den sendakba sample ajak negative putet

Dimapur, April 22, 2020 (TYO): Dimapur nung alir ka dak COVID-19 aliba putetba den sendakba nung Surveillance teams-i kibong 834 tashi nung nisung 4755 screen süogo. Iba atema tendangtsü atema yokba sample ajak negative ta putetogo, ta Principal Secretary, Home, Abhijit Sinha, IAS-i tanü metetdaktsü.
Bodbar nikongtsütsü 3:00 ako tashi nung sample 543 tendangtsü yokogo aser iba nung tanü sample 6 yokba dena lir. Tang tashi nung samples 481 indang osang aruogo aser ajakji negative lir. Tanüngba sample 62 indang osang ano mangu lir, ta Abhijit-isa ashi.
April 22, 2020 nü nisung 1452 tashi screen süogo aser Facility Quarantine nung nisung 120 tashi yua lir, ta paisa shisem.
Public ajangzüktsü asoshi Nagaland Medical Council (NMC)-i Department of Health & Family den yaritepa Kohima aser Dimapur nung OPD services agütsütsü. District Hospital tem COVID Hospital kümdaktsüba ajanga iba mapa inyaker, ta Abhijit-isa metetdaktsü.
Iba mapa ya tanga district aser tesemtem nunga inyaktsü. Urban Primary Health Centre nung sorkar Doctor temi specialist consultation inyaka aruba mapa den talila inyaksemba lir, ta paisa shisem.
Tanga non-COVID health Centres aser nija mozütem nung PMJAY services maparen akhi ama inyaktsü.
Tangalen nungi aayangi arurtem asoshi District Administration temi relief camps aser shelters lapoka lir aser ketdangsertem den NGO temi chiyungtsü aser nüngdakbatem teyari agüja arudar, ta Principal Secretary, Home-isa metetdaktsü.
Nagaland nung tang relief camp 4 lapoka lir aser item nung aayanger 431 jenoka lir. Ano, food camps 5 lapoka lir aser anogoshia nisung 3800 tema nem chiyungtsü aser achiajemtsü agütsür.
Nagaland kübok tesem ajungalen jangotsü, mozü, totzü aser tongtipang nüngdakbatem ajak peria lir, ta Abhijit-isa ashi.