Dimapur DC den tepila sentong agi

Dimapur, Mongputeni/October 28 (TYO): October 28 nü DC Dimapur conference Hall nung Deputy Commissioner Dimapur, Kevekha Kevin Zehol den tepila sentong agiogo.
Sentong nung o jembidang Kevin-i, Dimapur nung mapa lemzüka aliba officer tem dang parnok tangar asoshi nükrangdong asütsü aser parnok asayameyang aser bendanga agüja inyakba ajanga district ya tangar asoshi nükrandong ka kümdaktsütsü ajungshi. Paisa Dimapur nung mapa lemzüka aliba ketdangsertemi mapa tajungba inyaktsüla ta ashi, kechiyong Dimapur nung facility ajak lir.
Maneni DC tejenbai Dimapur DC tasenba pelashishia agizükba den administrative officer, HOD, lokti tentet balala aser Police temi pa den teka amteper inyakba aser pa nongita yariba atema parnok dang pelaba metetdaktsü.
Dimapur DC tasenba, Anoop Kinchi IAS-i o jembiba mapang administration ya yimya agi team ka ama longjemer inyaker ta ashi. Paisa, administration-i nüburtem ola angatsüla aser takokba tashi parnok nem teyari agütsütsüla ta ashi.
Sentong nungsa Naga Council Dimapur, Dimapur Sardar GBs Union aser Western Chakesang Hoho amala lokti tentet balala nungi lenirtemi o tatsütsü jembia liasü.