Dimapur DC & DEO-i party balala den senden amen

Dimapur, March 13 (TYO): Dimapur Deputy Commissioner aser District Election Officer Dimapur, Kevekha Kevin Zehol-i March 13 nü DCs conference Hall, Dimapur nung yimtenren party balala den senden ka ayongzüka menogo; taruba Lok Sabha election atema osettsüset balala nung expenditure rates latettsü atema iba senden amen, ta ketdangsertem osang ka ajanga metetdaktsü.
Senden nung election dak sendakba nung indokba expenditures rates reprangshi aser yimtenren party balala nungi züngsemtem lia rates yanglua liasü.
Dimapur DC aser DEO-i yimtenren party balala nungi züngsemtem dang, Plastic free Nagaland campaign nungita election nüboyimba mapang nung plastic agi yangluba osettsüset kanga ajema amshitsü mepishi, ajioda yimtenren party temia melunga liasü.
ADC Dimapur aser Deputy DEO, Sharon Longchari-i Model Code of Conduct metetdaktsü aser party balala nungi züngsemtem dang ECI-i agutsüba telatetbatem metetdaktsü. Laisa party balala dang MCC nung aliba telatetbatem benshiba ajanga election junga agitsü mepishi.
Sharon-i, election anogo sangdongba mapang nungi MCC benoker aser election inyakyim metembang tashi MCC alitsü, ta metetdaktsü.
Laisa, social media aser paid news ajakji election expenditure nung adentsü aser MCC telatetbatem küboki aitdaktsütsü, ta ashi.
Senden nung AEO Dimapur, Roland Merry-i EVM aser VVPAT amshiyim sayua liasü. Senden nungsa Suwidha indang metetdaktsü aser app tasenba shiyua power point ajanga practical tesayuba agutsü. Iba app amshia party representative, candidate aser election agent temi online ajanga election dak sendakba temelaba balala meshitettsü. Iba senden nung NDPP, BJP aser DCC nungi züngsemtem aden.