Dimapur DC-i Nagaland atema Ujala Yojana sentong sayatsüogo

DC aser ADC Dimapur nati Rongchii (April) 14, 2018 nü Ujala Yojana campaign sentong sayatsüba mapang tangokba noksa nung angur.

Dimapur, Rongchii 15 (TYO): Administrative Officers Residential Complex nungi Rongchii 14, 2018 nü Nagaland state atema Ujala Yojana sentong Dimapur Deputy Commissioner, Sushil Kumar Patel (IAS)-i flagged off sütsüogo.
Rongchii (April) 14 nungi Monupii (May) 5, 2018 tashi amungtsü aliba Gram Swaraj Abhiyan nung Ujala Yojana ya Sabka Sath Goan Sabka Vikas campaign indang sentong ka lir, ta iba sentong nung jembiba mapang, Sushil Kumar Patel-i ashi.
Linük nung yimtsüng 21058 nung electricity maliba bushiteta Pradhan Mantri Sahaj Bijli Har Ghar Saubhagya kübok iba campaign mapang electricity inoktsütsü asoshi Ministry of Power ajanga renem, ta pai ashi. Nagaland nunga iba sentong ajanga yimtsü 1400 nung kongshir aser Dimapur district kübok yimtsüng 82 shimteta lir.
Ujala Yojana kübok Rongchii 14 nungi Monupii 5, 2018 tsüngta van ter nung sen 50 agi 9 watt LED bulb ayoktsü asoshi yimtsüngtem dangi aotsü aser iba bulb ya küm asem tsüngta timtem adokra melentettsü aser energy shilem 80 tashi kümzüktettsü, ta ADC Dimapur, Sara Jamir-ia iba sentong nung jembiba mapang ashi.
Iba sentong ya Ministry of Power aser Energy Efficiency Services Ltd (EESL) longjemer inyaker, kong LED bulb belenba indang taa mali aser bulb tem jenjang tajemba nung agütsür.
Dimapur district nem iba sabang agütsüba asoshi EESL dang pelar, ta lai shisem. Dimapur district administration-i EESL aser yimtsüngtem den osang agitepa yimdaklirtem ajangzüktsü asoshi Ujala Yojana sentong ya agir.
Iba sentong flagging off sütsüba mapang district ketdangsür, GBs, yimtsü balala nungi chairmen aser EESL nungi ketdangsertem arua aden.