Dimapur DC-i Nagarjan (Kuda) indoor badminton stadium lapoktsüogo

Dimapur, February 10 (TYO) : Tanü Hokolbarnü Dimapur Deputy Commissioner aser Dimapur District Sports Council (DDSC) Mendenbuba, Kesonyu Yhome, IAS-i, Nagarjan (Kuda) nung tan yanglushiba indoor badminton stadium lapoktsüogo.
Iba stadium nung asayartem training agia parnok temang tashi ita alitssü asoshi rubber pakti aser gym osettem yuja lir.
Stadium lapokba sentong nung jembidang, DC-i iba tetemsü badminton stadium yanglutsü asoshi mapang aser nübu bendanga agüja inyakertem nem tenüngsang agütsü.
Pai, stadium nung iba ama tanü asüng nüngdakba osettem anemokba ajanga state nung badminton asayatsü sempet keta aliba lanurtem tali ajungmesotsü aser lanur aika atsüa arutsü, ta ashi.
Dimapur District Badminton Association (DDBA) nung Tir Dr Wati-i, rubber pakti aser gym osettem atema Deputy Commissioner-i sen lakh 7 tenlaba asoshi pelaba metetdaktsü Ano DDBA züngsemtem aser mulungsoa nungitertemi maneni nungita yariba atema kanga pelar, ta paisa ashi.