Dimapur DC-i NAPO commercial complex lapoktsü

Dimapur, June 29 (TYO) : Bodbarnü Dimapur Deputy Commissioner, Kesonyu Yhome (IAS)-i Northern Angami colony, Kuda nung Northern Angami commercial complex building lapoktsüogo.
Sentong nung tongti tesemdanger o jembidang, Kesonyu Yhome-i Northern Angami Public Organization (NAPO) nem tenüngsang agütsü aser iba ya NAPA atema dang masü saka Naga nunger ajak atema nüngdak ka lir ta ashi.
Kesonyu-isa commercial complex merükmejua ayutsü atema jembi aser pai NAPO dang solid waste management system tenzüktsü atema tayongzükba agütsü.
Dimapur ama kanga dang kara ainba yimti ka nung jana endoktsü khuret kanga tulu kümogo, ta Dimapur DC-isa shisem.
Paisa, NAPO dang Naga nunger nem maongka agütsütsü aser ibaji ajanga state nung mapa manguba khuret ajema kümdaktsütsü ta ashi.
Sentong nung NAPO president, Vilie-o Rutsa-i tesentepertem pela agizük, NAPO, treasurer, Kevisobei Ziephrü-i ki asüba osang metetdaktsü, Hope Institute of Theology Principal, Zhao Sanchu-i meshiteta sarasadem aser NAPO Executive committee member, Kechangulie Lhongu-i anküp tepela o jembi.