Dimapur DC-i tzümetsüng aser ongkentem atema tebilemtsü abener

Dimapur, September 16 (TYO): Dimapur nung tzü atsüngba aser lenmang nung ongkentem aliba tebilemtsü lemsateptsü atema Dimapur Deputy Commissioner, Kevekha Kevin Zehol-i senden ka ayonga menogo.
Senden nungji Administrator, DMC, EE, PWD (R&B), Urban Development Officer, Dimapur aser SDO, PWD (NH) aden.
Four lane lenmang yangluba ajanga timtem ajuruba osang aika angashiba atema Deputy Commissioner-i National Highway ketdangser dang two lane nung garitem tiptema senzütsüsa mapa inyaktsü aser sensotem lendong nungi kümzüka ayutsü atema metetdaktsü.
SDO (NH)-i ashiba agi Aoyimti tashi yanglua aliba lenmangji tan September 21 mesüra 22 tashi nung lapoktsü.
Dimapur nung tzü atsüngba indang khurettem atema jembidang DMC Administrator-i parnok telongtet nung külentzü ayimdak tangbanga aliba lapoktsü atema task force ka tenteta mapa nungloktsüogo ta ashi.
Senden nungsa Kyong Colony nung külentzü aodak yanglutsü onük benoka lemsatep aser iba mapaji EE (R&B) o Urban Development Officer nem nungloktsü.
Dimapur DC Kevekha Kevin Zehol-isa Purana Bazaar apu aser Nagarjan apu indang osang asüngdang aser idangji Urban Development Officer-i “Purana Bazaar apu indnag mapa 75% tembangogo” ta ashi. Külen, EE (R&B)-ia “Nagarjan apu indang mapa 65% tashi inyakogo” ta metetdaktsü.