Dimapur DC leniba nung Dimapur DPDB senden menogo

Dimapur, Metsüremi/March 05 (TYO): Ita shia amenba Dimapur District Planning and Development Board senden March ita atema tanü Deputy Commissioner indang conference hall nung menogo, ta tanü ketdangsertem osang ka ajanga metetdaktsü.
DC Dimapur aser vice chairman DPDB Dimapur, Kevekha Kevin Zehol leniba nung iba senden amen.
Taoba DPDB senden nung lematetba onüktem reprangshiba sülen tanü Board-i proposals kar benoktsü lemtet, aser item rongnung School tasen- Bloom Academy Eralibill Dimapur lapoktsü, Weekly Bazaar Society, Thahekhu village- Block 4 Dimapur, Green Ura group, Medziphema Town, aser Keystone Education Society, Aoyimti Village, Dimapur densema lir.
Board-isa Great Commission Kids Academy, Naga United Village society registration atema benoktsü lemtet.
Iba dak alia Board züngsemtemi Diphupar village nung school tasen- Tuyitu foundation school lapoktsü atema benok aser Nihekhu, Dimapur nunga school lapoktsü atema benok.
Aqahuto, Dimapur nung EAC administrative headquarter tasen amenoktsü atema sorkar matsüngdang benoktsü asoshi Board-i lemtet.
Universities, college aser school aika tenzükba dak sendakba nung Dimapur DC-i DEO aser SDEOs dang shisaliok rejuatem nung shisaliok tajung agutsütsü atema metetdaktsü.
Administrator DMC, Moa Sangtam-i departmental mapatem osang metetdaktsüdang DMC-i inyakba project “A better Dimapur” indang metetdaktsü. Iba project nung nüburtem nem shilem agidaktsüba ajanga yimti merüka alitsü aser süngdonglidong peria alitsü nükjidong nung inyaker.
Paisa Dimapur district kübok ketdangsertem dang iba project nung shilem agitsü ayongzük.
Kasa senden nung PWD (R&B), Er. Talitemsu-ia yimti nung apu teyangludak ana- Nagarjan bridge aser Referal hospital anasa aliba Chate ayong nung apu na indang osang metetdaktsü.
Urban Development aser district Agriculture department na dang taruba DPDB senden nung pei pei departments osang metetdaktsütsü nenshia metetdaktsü.