Dimapur DDC-i NPF den loktepogo

Dimapur, November 1 (TYO): Bodbarnü Tir Kughato Aye-i anir Dimapur District Congress Committee (DCC) purtem Lok Sabha MP, Neiphiu Rio aser Chief minister TR Zeliang na lenisüba kübok NPF den loktepogo.
Iba telemtetba ya October 30 nü rongdak senden ka amendang agia liasü. Iba senden nung party indang tarutsü indang tebilembatem benoka lemsatep aser party sasep nung obang meputep aliba onüktem aika aliba ajiteta NPF nung adentsü telemtetba agi ta tanü NPF ketdangpurtem adenshia lia Kughato Aye-i ashi.
NPCC tir K Therie-i pa sünütsü aser bilemba ama dang inyakdi ta asüba ajanga party nung obang mapu aser mepetmesü aika adokogo aser iba ajanga party indang asalentongtem tejakleni bener mouteter aser party tajungba küma memelenshiteter, ta Aye-isa shisem.
Iba sentong nung Flood & Irrigation Parliamentary secretary, Tovihoto Ayemi aden aser pai DCC züngsemtem pelaa agizüka jembidang, “iba telemtetba ya kanga dang tasü itta agiogo aser NPF den loktepba ajanga asenoki Naga nunger taginüba asoshi mapa tuluba inyaktettsü” ta ashi.
Iba inyakyim ajanga NPF party tashi itshitsü aser asenok tsüngda mepetmesü onük tilateritem aliba agiener asenoki nübortem atema inyaktsü merangdi, ta Tovihoto-isa tasenpurtem ayongzük.
Iba sentong nung NPF Dimapur division Nungsang Jamir, NPF Working president N Konyak aser Lipok Pongen nungertemia o jembi.