
Dimapur, may 17 (TYO): Taküm HSLC aser HSSLC tatidangtem nung Dimapur nung aliba sorkar school temi nija school tem dang nungi takok tajung mengutetba atema tebilemtsü bena Deputy Commissioner Dimapur, Kevekha Kevin Zehol-i tanü senden ka ayonga amen.
May 17, 2019 nü DEO office, Dimapur nung ayonga amenba senden nung Dimapur district kübok sorkar school tem nungi Principals, Headmasters/ Headmistress aden.
Dimapur district nung sorkar school karibo takok tajung ngutetogo aser iba atema tenüngsang agütsür saka takok tajung mengutetba school temi metokmeperi reprangshimer tarutsü nungbo takok tajung angutsü merangtsü ayongzüker, ta tanü Dimapur DC Kevin-i ashi.
“Itasen tajungba anguba sorkar mapa inyakertemji tesayurtem lir anungji nenoki missionary tangatetba nung mapa inyaktsüla, kechiyong nenok ket nung tarutsü putu amma lir” ta paisa ayongzük.
“Dimapur nung inyaktsü atema mapa lemzükbaji kanga tia taka saka tenüng atema meinyaktsüla. Nenoki nisung ka jungjunga sayutetra, ibaji missionary mapa tuluka inyakba ama asütsü” ta DC Kevin-isa ashi.
Senden nung Dimapur district nung aliba sorkar school ajaki pei pei school indang osang lemsatep.
Iba mapang school temi khuret ajurubatem lemsatepdang infrastructure shitak maliba, classrooms peria maliba, nübo maliba aser jungjunga masadangi school tem jenjang ajungketbatem indang ashi.
Item onük atema Dimapur DC-i DEO dangi tezüluba nung abentsü tetuyuba agütsü aser pai nüngdakba onüktem nung yariteptsü nangzük.
Senden nung Dimapur DEO, Amongla-i tesentepertem dang results tajung angutsü atema pei sasa azüoktsü aser tashi angatsü atema ayongzük.
Dimapur Deputy Commissioner-i kaketshirtem atema tebilemtsü abenba atema laisa pelaba metetdaktsü.
You must be logged in to post a comment Login