Dimapur dist. nung HIV tashidak aketer 938 lir

Dimapur, Tsüklai/February 27 (TYO): Dimapur District, District AIDS Prevention & Control Committee (DAPCC) 4buba quarterly senden DC conference hall nung February 27 nü menogo.
Iba sendne ya DC Dimapur, Anoop Khinchi IAS lenisüba nung agi aser pai district kübok stakeholder tem ajak tali tangatettep nung inyaktsü aser nükjidong atogtsü asoshi sentong tajung ka yanglutsü ayongzük.
M&E asst. DAPCU, Yanger Aier-i district nung HIV jenjang metetdaktsüba mapang 2019 küm April ita aser 2020 January ita tsüngda nisung 12,512 dak HIV tendangogo aser parnok rongnung general category kübok nisung 881 dak HIV+ve aliba putetogo aser mashisaa alir parnok 4,025 tendangba nungi nisung 57 dak HIV+ve aliba putetogo, ta ashi.
Ketdangserisa tashidak menatepba yimyatem rongnung: shi nung medemba ajanga menatepba 95%, tsürapur dak nungi tanur menaba 3% aser needle syringes ajanga menatepba 2%, ta ashi. ART dak sendakba nung pai sentepa aliba lokti dang, 2020 küm January 31 tashi nung nisung 10,836 züngoksema lir aser parnok rongnungi nisung 7762 ART tenzükogo, nisung 1020 süogo, nisung 4564 taküm lira ser ART agidar aser nisung 613 taomung mejangjai kümogo, ta ashi.
Senden nung züngsemtemi, tetsü nungi tanur dak HIV menaloktsüba nokdangtsü asoshi, tashi menar alirtem aser iba ajanga kongshir alirtem atema sentong aser scheme balala indang, chijemba tsütsü teyari asoshi aser beneficiaries tem tajangzüktsü agitsü asoshi tetsükdaktsü adokba, ART center nung nübu agi ajema aliba aser iba tashidak dak sendakba nung tangazükba agütsütsü asoshi sabang balala lapoktsütsü atema sensaksema liasü.
Maneni senden nung TI NGOs Accelerate (OVC) dak sendakba nung presentation ka PO NETSU, Anna Hairang aser Programme Coordinator, Nukshinaro nati agütsü.