Dimapur district atema tetuyuba kar agütsür

Dimapur, March 20 (TYO): Dimapur district nung Coronavirus Pandemic (COVID-19) prokshiba azüoktsü atema Commissioner of Police, Rothihu Tetseo, IPS-i tetuyuba kar agütsüogo.
Tang nungi lokti sentong/sendentem alitsü atema permit tasen magütsütsü aser nüngdak maliba lokti sentongtem atema permit agüja aliba ajak agiener. Maneni, Dimapur nung alirtemi nüngdak melira public tesemtemi maotsü aser lokti alidak madentsü metetdaktsür, ta Commissioner of Police-i metetdaktsüogo.
Dimapur-i aruba commercial aser nija gari ajak screening asütsü. Ajisüaka, local, inter-state aser inter-district transit atema bus, taxi aser auto rickshaw service akhi ama senzütsü, ta paisa ashi.
Public transport nung senzürtemi bus & taxi station/ auto rickshaw stand nung kanga kümdangtsüla aser Public Transport kiburtemi mozü agi gari merüka ayutsü metetdaktsür, ta Rothihu Tetseo-isa shisem.
Dimapur district nung Lodgings/ Shelter Homes/ Dharamshalas/ Homestays/ Hostels kiburtemi nisungtem arua anenzükba jungjunga bendentsüla aser temulung melemi bilemtsüsa nisungtem arura, anepdang 9:00 ako nungi nikongtsütsü 4:00 ako tashi Dimapur District Control Room (M/No-7630877991/ 7630877983) nem osang sangoktsütsü metetdaktsür, ta Commissioner of Police, Dimapur-isa ashi.