Dimapur district atema tetuyuba kar agütsür

Dimapur, April 15 (TYO): Tanga tetuyuba ka magütsü tashi Dimapur kübok GS Road nung wholesale market maneni shibangtsü, ta Dimapur district administration-i metetdaktsüogo.
Special Committee for Covid-19 Dimapur den Police, Dimapur Municipal Council aser Dimapur Chamber of Commerce & Industries senden ka amendang iba telemtetba agi.
GS Road shibangba ajanga ketdangsertemi wholesaler tem atema tesem ka shimtettsü aser iba osangji yakta yimjak nung metetdaktsütsü, ta parnoki ashi.
New Market, Marwaripatti, Murgipatti aser GS Road dak alaka tanüngba colony ajak nung anepdang 9:00 ako nungi nikongtsütsü 2:00 ako tashi dokantembo maneni lapoktsü, ta district ketdangsertemisa ashi.
Ano, Dimapur Deputy Commissioner Anoop Khinchi-i tanü sangdong ka nung Dimapur District kübok colony aser yimtsüng balala nung aliba bakery tem anepdang 9:00 ako nungi nikongtsütsü 2:00 ako tashi lapoktsü melaba osang metetdaktsüogo.
Ajisüaka, Dimapur jila tiyongtsü nungbo tanga tetuyuba ka magütsü tashi melapokdaktsütsü, ta DC-isa shisem.
Anoop Khinchi-isa social media nung taila osang aser olulu prokshiba atema tekümdangtsü ka metetdaktsü.
Iba mapa inyakertem Disaster Management Act 2005, IT Act 2008 aser IPC kübok temerenshi alitsü, ta pai ashi.