Dimapur district BJP-i BJP-i aniba NDA sorkar küm pezü ajungba sentong agi

Dimapur, Aami/June 07 (TYO): Tanü Town Hall, Dimapur nung Dimapur district BJP-i Centre nung BJP-i aniba NDA sorkar küm pezü ajungba benjungmong sentong ka agiogo.
Iba sentong nung jembidang Geology & Mining, Soil & Water Conservation Minister, Kashiho Sangtam-i Centre nung BJP-i aniba NDA sorkari inyaktetba mapatem metetdaktsüba den külemi Ato kilonser, Narendra Modi-i teladak süa inyakba aser pa lenisüba kübok ochishia yimsüsüba atema tenüngsang agutsü.
Paisa, BJP sorkari tanga linük nungi India-i black money bener aruba lenmang nokdangtsü atema inyak, ta ashi.
Kashiho-i Modi sorkari schemes balala ajanga mapa agutsütsü atema inyakba indang metetdaktsüba den külemi Swachh Bharat Abhiyan kübok linük nung metsümeshidak crore tenet yanglutsüba indang metetdaktsü.
Kasa sentong nung Marcofed Chairman, Dr. M. Chuba Ao-i, Modi sorkari sensaker aser nüngdakbapur shirangertem nem angati dialysis agitsütsü atema district hospitals nung angati dialysis centre 500 lapoktsüogo, ta metetdaktsü.
Pai ashiba agi, taküm Aenjeti ita nungi Metsüremi (January-March) ita tashi nung India linük GDP shilem 7.7% tashi kümogo, ajisüaka kidanger linük, China bo GDP shilem 6.8% dang lir.
Iba sentong tembangba sülen Minister, Kashiho Sangtam den BJYM Dimapur President, Khekishe Aye nati BJP-i aniba NDA sorkar küm pezü ajungba nüngtem nung anüngleni ‘balloon’ chiok aser bike rally-a ka tenzükja liasü.