Dimapur district DAN legislators den senden amen

Dimapur, February 13 (TYO) : Honibarnü NPF Dimapur division-i ayongzüka Dimapur district DAN legislators den senden ka NPF division office, Landmark colony nung ayongzüka amen.
Iba senden nung Dimapur district nungi MLA pezü – S I Jamir, Advisor, Urban Development, Jacob Zhimomi, Parliamentary secretary, Irrigation & Flood Control, Tovihoto Ayemi, Chairman, NIDC Ltd aser MLA Zaleo Rio nungertem aden. Dimapur district nungi MLA tem rongnung Tokheho Yepthomi, PHED minister medentet kechiyong pa dang Delhi nung mapa kar atema oa lir.
Senden nung MLA pezüi züngsem ajak longjemer alitsü aser district renlokdaktsütsü atema mapa inyaktsü ayongzük.
Linük nung regional political party tejentem rongnung NPF ya ka lir aser Nagaland nung opposition maliba sorkar ka abener, anungji party workers-i sorkar tashi itdaktsütsü atema inyaktsü mepishir, ta Dimapur district nungi MLA temisa züngsemtem ayongzük.
Senden nung NPF Dimapur division president, I. Nungsang Jamir-i tesentepertem pela agizük, NPF working president, Apong Pongener aser NPF general secretary, K G Kenye natia o tatsütsü jembi aser NPF Dimapur division general secretary, Choba Lotha-i anküp tepela o jembi.
February 16, 2016 nü NPF president Dr. Shurhozelie Liezietsu-i anir telok kati Tuensang aser Shamator-i goodwill mission aotsü aser iba mapang parnoki iba tesem nung alir lennirtem den ajuruteptsü.