Dimapur district MLA tem den rongdak senden amen

Dimapur, July 23 (TYO): Dimapur nung tzümetsüng timtem atema district nungi MLA tem Imtisungit Jamir aser Tovihoto na den Honibarnü DC conference hall nung rongdak senden ka amen.
Senden nung Dimapur DC, Kesonyu Yhome-i MLA ana dang DDMA ajanga tzümetsüng atema mapa inyaka aruba aser teinyaktsütem indang osang lemsatep.
Tan ita tetenzüklen 4th Mile nung apu chirepba dak sendakba nung Dimapur DC-i MLA tem dang senotsü aser nübo nüngdaker ta ashi.
Senden nungsa Commissioner of Police aser tanga department tem nungi ketdangsertemi parnok indang osang metetdaktsü.
MLA Sungit-i Dimapur nung kilentzü ayimdak junga maliba atema ashidang, jila nung alirtem ajangzüktsü atema iba maparen reprangshimtsüla aser ali atsünga agirtem ozüng tapet agi merenshitsüla, ta metetdaktsü.
Alima lendong-tsüdongji meimchiri mazüoktettsü saka iba ajanga meimchir takümtem akoksar. Dimapur nung tzümetsüng timtem nung district administration aser DDMA-i mapa tajung inyakba atema kanga pelar, ta MLA Tovihoto-ia senden nung metetdaktsü.
Senden nung Dimapur DC aser Commissioner of Police Dimapur den ADC headquarter, ADC Niuland and Medziphema, CMO Dimapur; EE R&B, EE PHED Dimapur, CEO DMC, administrative officers aser DDMA purtem aden.