Dimapur, January 17 (TYO) : Linük den tsüngsü medema Dimapur District nunga Jahnuary 17, 2016 nü Intensive Pulse Polio Immunization mezüngbuba shilem agiogo.
Tanü Dimapur Deputy Commissioner, Kesonyu Yhome-i mezüngbuba Oral Polio Vaccine (OPV) agüja liasü.
District Hospital Complex nung sentong tatsüka agia polio mozü jemdaktsüba sentong tenzüktsüdang Kesonyu-i ashiba agi, India nung National Project tulutiba anaji – election aser Polio na lir.
IPPI ya Department of H&FW-i dang süoki ia bilema inyaktsüba mapa ka masü saka India nunger senso ajaki iba sentong nung yariteptsüla, ta paisa ashi.
“District Collector ka ama ni iba sentong tajung nung shilem agitsü maongka anguba atema kanga pelar” ta tanü Dimapur District hospital nung DC Kesonyu Yhome-i tanur ka nem mezüngbuba Oral Polio Vaccine(OPV) jemdaktsüdang ashi.
Dimapur District nung nütsüng yongsük 3,79,769 lir aser nungi shilem 14 ji arishi küm 5 nungi teküpok tila tanurtem lir.
Deobarnü Dimapur district nung IPPI mezüngbuba shilem agitsü atema tesem balala nung booths 512 lapok aser item nung supervisors 102 aser health workers 2048-i tanur nem polio mozü jemdaktsü.
IPPI tanabuba shilemji February 21, 2016 nü agitsü.
You must be logged in to post a comment Login