Dimapur district nung Road safety week monga arudar

Dimapur, Rongchii/April 27 (TYO): District Transport Office, Motor Vehicles Department, Dimapur-i linük tesem ajak den liromedema Rongchii (April) 23, 2018 anogo nungi tenzüka 29buba National Road Safety Week 2018 monga arudar aser iba sentong Rongchii (April) 30, 2018 nü tembangtsü, ta tanü District Transport Officer, & Member Secretary, District Road Safety Committee, Dimapur, Lovikali Yepthomi-i sangdong ka nung metetdaktsü.
Iba campaign dak sendakba nung District Road Safety Committee-i parnok office nung Rongchii (April) 26, 2018 nü Free Eye Camp ka ayongzüka katsüogo. Iba camp nung Chief Medical Officer, Dimapur-i yaritepa liasü aser iba atemaji pa dang pelaba lemsatep.
Iba dak alia Road safety awareness atema Rongchii 27, 2018 nü parnokisa Motorcycle rally ka Nagaland Motorcycle Club den külemi yaritepa agia liasü, aser iba rally nung yaritepba atema parnok danga pelaba metetdaktsü.
Iba rally ji Additional Deputy Commissioner, Dimapur, Sarah Jamir-i tenzükja liasü. Iba rally nung Bikers-i jila sema senzü aser Chumukedima nung aliba DTO office nung tembanga liasü, ta kasa sangdong ajanga metetdaktsü.