Dimapur District nung ‘Swatchhata Hi Seva’ Campaign tenzükogo

Dimapur, Rongjui/September 16 (TYO): September 16, 2019 nü Dimapur District atema “Swatchhata Hi Seva (SHS)-Cleanliness is Service” campaign “Plastic Waste Shramdaan” omen nung tenzükogo; iba campaign ya Convenor, Zero Waste Himalaya Nagaland, Thangi Mannen-i tenzüktsü, ta ketdangsertem osang ka ajanga metetdaktsü.
DC’s conference hall Dimapur nung ayongzükba sentong nung okila jembidang Thangi Mannen-i, Ato kilonser, Narendra Modi-i 2022 küm tashi nungbo linük nung single use plastic samatsütsü sangdongogo, aser India linük nung iba nükjidong ataloktsü atema SHS, 2019 ya tetenzüker lir, ta metetdaktsü.
Laisa, iba campaign ya shilem asem lemsar agitsü, mezüngbuba shilem ji September 11 nungi October 1 2019 tashi asütsü aser iba ya awareness agütsüba mapang asütsü; tanabuba shilemji October 2 nü agia lokti nübodok mapa inyaktsü aser tasembuba shilemji October 27 nungi tenzüktsü, aser iba mapang nung jana recycle asütsü atema bendenba, bendangba aser belenba nung sorkar departments, melungtet teloktem, institutions aser nisung ajaki shilem agitsüsa akümtsü, ta metetdaktsü.
State tesem ajungalen nungi bendenba janaji Dimapur nung bendentsü aser iba atemaji lai Administration aser DMC dang bailing machine ka renemtsü metetdaktsü.
Iba sentong ya Dimapur DC, Kevekha Kevin Zehol leniba nung agi aser Urban Development Officer aser Member Secretary, Pangzangkokba-i tepela anküp o jembia liasü.