Dimapur District Planning and Development Board senden amen

Dimapur, January 05 (TYO): 2017 küm asoshi District Planning and Development Board (DPDB) mezüngbuba senden January 5 nü Deputy Commissioner indang Conference Hall nung kaogo.
Iba senden tenzüka Dimapur DC aser Dimapur DPDB Vice Chairman Kesonyu Yhome ajanga senden nung adener pelashishia agizüba den külemi küm tasen salem lemsatepa liasü.
Iba senden nung Thahekhu nung aliba Spring Blossoms Academy class V nungi class X tashi Upgrade/recognise asütsü atema jembia liasü aser Chungaijang Rongmei Colony nung Primary School ka lapoktsü atema jembia liasü. SDO(C) Sardar ajanga kulitem bushiba osanga agütsü aser iba onük jungjunga shisadanga jembir, Education department dangi yoktsü lemtet.
Lemzükja aliba ama PHE aser Transport Department ajanga par department osang agüja liasü. DC Dimapur ajanga department nung tekolakpur tang kiojen yangluba osang kisüng masü saka scheme aser project balala inyakba ajanga nüburtem shitakba ajangzüker asü masü, ibaji tejangja metettsü asoshi shia liasü.
Agenda tak alaka, town council election agitsü aliba atema kanga süoki ia osang-ola agiteptsü asoshi Kesonyu-i ashi. Iba polling nung achayangtsüpur nem mezüngbuba training agutsütsü asoshi January 12, 2017 anogo shimteta ayu. ‘Smoke free Dimapur’ campaign indang inyakyim osang agytsüba den külemi office balala nung tekolakpur dang office telongtet nung moko machitsü asoshi sentong balala achayanga, sorkar mapa inyaker tajung ka ama alitsü ajungshia liasü. Nagaland nung moko machir shilem 59-i mapa inyakba tesem balala nung moko achir-i menentaktsüba atema jungjunga bilemdangtsü asoshi senden nung adener dang shia liasü.
Municipal poll mapang amshitsü asoshi officer tem ket nung aliba sorkar garitem ajak 17th January, 2017 anogo nung Dimapur Stadium anasai yoktsü, SDO (C) Moa Sangtam ajanga senden nung alir dang metetdaktsü.
Veterinary & Animal Husbandry department aser District Education office ajanga taruba DPDB senden nung parnok department osang agutsütsü asoshi lemtet.