Dimapur district Polling ketdangsertem training agi

Dimapur DC, Kesonyu-i training agitsübur polling ketdangsertem den jembiba noksa nung angur. 

Dimapur, January 12 (TYO): Municipal aser Town Council elections agitsü atema Dimapur district Polling ketdangsertem atema mezüngbuba shilem training tanü Dimapur Government College nung agiogo.
Iba training metenzükdang Dimapur DC, Kesonyu Yhome-i polling ketdangser ajak dang, election ketdangsüa agidang timtem madoktsü asoshi iba training nung süoki ia dendaktsüner, ta metetdaktsü.
“Civic election agitsü atema polling ketdangser ka ama nd nem appointment order agüja aliba nung ajemdaker, joko election maparen metembang tashi naji State Election Commission indang tetuyuba aser tazüokba kübok lir,” ta Yhome-i metetdaktsü.
Paisa, ketdangsertemi aibelena inyaksemra pa/la tenzükba department-i masü saka State Election Commission-i temerenshi agütsütsü, ta nenshia metetdaktsü.
Election agiba mapang Presiding aser 1st polling officers ji kanga tongtibang ta shia pai, iba maparen zübazüba magitsüla ta ashiba den külemi taoba mapangtem nung polling ketdangser kari aibelena inyakba atema mapa nungi anentsüba indang ashi.
Training mezüngbuba shilem nung Presiding officers, 1st, 2nd aser 3rd polling officers densema parnok 800 aden. Training tanabuba aser tasembuba shilemji January 20 nü aser January 27, 2017 nü agitsü.