Dimapur nung totuyuba makai Industrial unit amenokba mittsü

Dimapur, Tsüklai/February 20 (TYO): Ita shia amenba Dimapur District Planning and Development Board senden February ita atema DC Dimapur conference Hall nung February 20 nü menogo. DC Dimapur Anoop Kinchi IAS shiba DPDB Dimapur Vice Chairman lir, pa lenisüba kübok iba senden agi aser pai board züngsem ajak pelashishia agizüka liasü.
Taoba senden minutes lepa reprangshiba mapang nisung aliba tesem aser school anasa longtepdak aser longru aroba tesem amenoka aliba dak sendakba nung DC-i, DIC, Geology & Mining, Pollution board, district administration aser labour department züngsem ama committee ka tentetogo. Item department tem yagi factory/ industry tem ya nisung nem timtem bener marutsütsüsa aser tsümopung memenentsüsa atakzükja aliba temzüng ozüng kübok amenok asü masü aji asadangtsü, ta ashi. DC-isa PMEGP kübok bank temi loan agütsütsü asoshi nongnangba asadangtsü atema committee ka tentettsü benokdang.
Department inyakyim benokba mapang E.E. PWD (R&B) Engineer Tali Temsu Jamir-i, power point presentation ka ajanga Dimapur kübok lenmang 25 yanglushia aliba aser CSS kübok lenmangtem yanglua aliba osang tejangja agütsü. Engineer Tali-i, lenmangtem timba ka yanglushiogo saka item ya anepalutsü asoshi khuret tali bendenloka aoer, ta ashi. Iba ken o bentettsü asoshi takaratiba nung inyaksangshitsüla aser iba atema political teyari nüngdaker, ta paisa ashi. Paisa, maintenance fund ama amshitsü asoshi Diesel aser petrol nung saru meshitsü asoshi benokdang. Tatishitsüka agüja pai, Diesel liter shia paisa 75 agiba ajanga PMGSY programme kümteter, ta ashi.
Maneni pai ashiba agi, senzüsenpongtsü asoshi infrastructure junga yangluba ajanga dang lokti aser reogsenketsü nung terenlok bener arutsü. Engineer Tali-i, lenmang koba technical design nung yangludir yangluaka mapang shia anepalutsü nüngdaker ta ashi. Nagaland nung fund ajema agütsüba aser lenmang anepalutsü asoshi fund magütsüba ajanga district ajak nung lenmang kanga mejungi lir, ta paisa ashi.
PWD Housing Dimapur aser Fire and Emergency services-ia parnok department inyakyim metetdaktsü.
Senden nung Salt Brook School Tenyiphe- I, E- Khel , Chumukedima, Amazing Grace School, Seithekima- A, Chumukedima, Centurion School, Urra Village, Dimapur ta school tasen lapoktsüba aser Paramount Educate Montessori nüngja Paramount Educare School-i melentsü asoshi benoka board züngsemtemi temaba kendangsertem dangi abentsü lemtet. Board-isa, Shem Education Society Diphupar züngoksemtsü atema benoktsü mulunga agizük.
Power department aser Nagaland State cooperative Bank nem taruba DPDB senden nung department inyakyim lemsateptsü asoshi tetuyuba agütsüba sülen mendeni tepela anküp o jembir senden tembang.