Dimapur DPDB senden nung 2016-17 LADP agizük

Dimapur, August 10 (TYO) : August 10, 2016 nü DC Conference Hall nung August ita atema Dimapur District Planning & Development Board senden amen.
I&FC Parliamentary Secretary aser DPDB Dimapur Chairman, Jacob Zhimomi lenisüba kübok senden amenba nung 2016-17 atema Local Area Development programme (LADP) agizüka ayu.
Senden nung verification committee ajanga osang agütsüba nung ajemdaker, Immanuel Multipurpose Welfare Society, Khekiho Colony, Kuhobuto Town, Living for Environment Society, Indisen village aser Immanuel College Alumni Association, Lengrijan registration tem agizük aser Tokiye, Zunheboto District nungi Padam Pukhuri, Dimapur District-i Sunrise Secondary School belenba agizük. Senden nung adenertemi iba onük sorkar dangi abentsü atema lemtet.
Senden nung Power aser Forest Department temi power point presentation ajanga parnok department temi inyakba osang lemsatep aser State Leprosy Officer, Dr. Ahu Sekhose-i Dimapur district nung leprosy bulua adokba atema department-i ‘house to house screening’ asütsü ta metetdaktsü.
Dimapur Deputy Commissioner, Kesonyu Yhome, IAS-ia heads of the office ajak dang PIO mesüra APIO tem RTI training nung adentsü atema yoktsü nenshia metetdaktsü.
Iba training ji August 23 & 24 anogotem DC Conference Hall nung alitsü ta Kesonyu-isa ashi aser paisa heads of offices dang DDSC Stadium nung Independence Day amungtsü atema mapa inyakba semdangtsü tetuyuba agütsü.
DPDB, Dimapur Chairman, Jacob Zhimomi-i senden tembanga o jembidang, Dhobinalah-Thahekhu lenmang tembanga yangluba atema Chief Minister, TR Zeliang aser bangdak department Minister dang pelaba metetdaktsü.