Dimapur DPDB senden nung CCTVs inoktsü indang jembi

Deputy Commissioner, Dimapur indang Conference Hall nung May 5, 2023 nü Dimapur District Planning & Development Board senden amendang tangokba noksa ka nung DPDB Dimapur mendenpuba Moatoshi Longkumer den Advisor Tovihoto Ayemi aser Advisor Hekani Jakhalu nungertem angur.

Dimapur, Monupii/May 05 (TYO): State nung 14th Nagaland Legislative Assembly indang elections agir Dimapur District Planing and Development Board senden mezüngbuba May 5, 2023 nü Advisor, Moatoshi Longkumer lenisüba kübok agia liasü.

Iba senden nung Advisor Tovihoto Ayemi aser Advisor Hekani Jakhalu nungera dena liasü aser DPDB Dimapur indang chairman, Moatoshi Longkumer-i benokba onük balala jembia liasü aser item rongnung Dimapur district kübok dokan ajak aser yimtong nung CCTV inoktsüba indang onüka jembia liasü. Iba dak sendakba nung DPDB Dimapur mendenpubai department ajungai pei office nung mapang telatet ka tsüngta CCTV inoktsü nüngdaker, ta shia liasü.

Street lights atema Commissioner Police ajanga sorkar dangi abentsü senden nung molunga lemtet.

Ano iba densen nung tongtipang onük ka jembibaji yimti tebour raksaja cable wire mesangshia aliba aser telephone post songa aliba indoktsüba indang liasü. Iba dak sendakba nung district administration ajanga Cable TV agütsür ajurua aser SDO (C) ajanga field visit ogo aser inyaktsü sentongtem yanglua lir, ta Deputy Commissioner, Dimapur, Sachin Jaiswal, IAS ajanga metetdaktsü.

Iba mapa mapang telatet ka nung inyaktsü atema Task Force ka nüngdaker aser parnok den administration aser police temi yariteptsüla, ta DPDB chairman-i ashi.

Senden nung Dimapur tebour tajungba kumdaktsütsü asoshi jembidang Forest aser Horticulture department ajanga tongti shilem agitsü tim, ta jembia liasü.

Ochishia aser bendanga agütsür inyaktsü nükla nung department ajaki ita shia department inyakyim/terenlok osang DC Dimapur nem agütsütsü iba senden nung pangjema liasü, aser iba onük DPDB Dimapur mendenpubai benoka liasü.

Iba dak sendakba nung, asenok nüburtem asoshi alir asünung department balalai scheme mapa kuma inyakba nüburtemi metettsü tim, ta Advisor Hekani-i ashi.

Advisor Tovihoto-i ketdangsürtem dang Dimapur nung aliba nüburtem tenzükba ya maongka ka ama agitsü ayongzük aser nüburi nüngdakba mapang ajak nung renema alitsü ajungshia liasü.

Pai ketdangsürtem dang DPDB senden nung mapang shidak amshitsü aser teti adentsü ayongzüka liasü.

State nung Dimapur ya tongtipang district ka lir, aser state tarutsü jenjang yangluba district ji Dimapur ya asütsü, anungji ketdangsürtemi lungjemer Dimapur tejakleni anir aotsüla, ta lai ajungshia liasü.

Iba senden nung school tem upgrade asütsü, Grant-in-aid, Nagaland University kübok Para medical & allied lapoktsü aser CMHIS registration indanga jembia liasü.

Senden nung Team Dimapur ajanga inyaksangshiba osang power point dener agüja liasü.