Dimapur DPDB züngsemtemi yimtong aokba gol alitsü pangjem

Deputy Commissioner, Dimapur indang Conference Hall nung July 22, 2022 nü Dimapur District Planning & Development Board senden alidang tangokba noksa ka yangi angur.

Dimapur, Chiteni/July 22 (TYO): Dimapur District Planning and Development Board züngsemtemi Dimapur district atema seed money lemzükja aliba nungi Truck Mounted Sweeping and Cleaner Machine alitsü pangjema liasü.

Dimapur yimti müreka ayutsü atema iba ‘high tech sweeping machine’ alitsü onük ya Chairman, DPDB Dimapur aser MLA Moatoshi Longkumer-i benoka liasü.

Hokulbarnü Dimapur District Planning & Development Board senden nung jembiba mapang, iba gol indang jenjang ya sen lakh 31 lir aser Dimapur atema common pool fund ya sen lakh 23 lir, ta Moatoshi-i metetdaktsü.

Iba atema pai temaba ketdangsür dang tanüngba senotsü asüngdangtsü, ta ashi aser Dimapur yimti müreka ayutsü asangsang kumdaktsütsü atema züngsemtem danga tenlatsü ayongzüka liasü.

Iba maparen atema loktii molunga agizük aser Deputy Commissioner, Dimapur, Sachin Jaiswal, IAS-ia district atema iba ama mapa nung akok tashi yaritsü ashi.

Society registration atema aikati asüngdanga aliba dak sendakba nung, register süa aliba society temi shidakba inyakba aser par nükjidong ama liteter asü masü ta ketdangsürtemi asadangtsü nüngdaker, ta MLA Moatoshi-i ashi.

Deputy Commissioner, Dimapur ajanga züngsemtem dang ita shia DPDB senden amenba nung medema arua adentsü nenshia metetdaktsü.

Iba senden nung Diphupar nung aliba Grace Christian Mission School, Nihoto Village-i belentsü indang jembia liasü.

Lampstand Hr. Secondary School, Toluvi ajanga nüngdakba criteria ajak abensa inyaktetba aser tatidang result junga anguba asadanger lokti-i iba school nem Grant-in-aid agütsütsü lemtet.

Society kar register asütsü indanga iba senden nung jembia liasü aser teloki agizüka ayu.

Principal, Dimapur Government College, Lilanthung ajanga senden nung PowerPoint presentation agütsü aser tang college nung teinyakdak maparen balala aser tarutsü nung inyaka aotsü indang lemsatepa liasü.