Dimapur DPRO Lolano-i EBVSS training tenzüktsü

Luroi/August 24, 2018 nü  Youth Hostel Dimapur nung (EBVSS) training sentong nung training agirtem, tetushi tejaoker, DPRO Dimapur, Lolano Patton aser UNV District Youth Coordinator, K.Phyobemo nunger tangokba noksa nung angur.

Dimapur, Luroi/August 24 (TYO): Tanü Youth Hostel Dimapur nung District Public Relation Officer (DPRO) Dimapur, Lolano Patton-i Education in basic vocation & soft skills (EBVSS) training tenzüktsüogo, ta ketdangsertem sangdong ka ajanga metetdaktsü.
Training agirtem den jembidang Dimapur DPRO-i, sorkar aser nija sector naprongla nung temaba jenjang skills kanga nüngdaka kümogo, koba ajanga Central den state sorkar aser lokti tentet balalai senotsü agi yariba vocational education kanga terenlok akar, ta ashi.
Laisa training agitsü atema shima alir tetsür 20 shi dang, nenok kanga tia taka, kechiyong Ministry of Youth Affairs & Sports, Government of India-i sponsor asüba tsüngsem yangluba basic education maongka nenoki angur, ta ashi.
Patton-isa, basic vocation education mesüra skill based education ajanga training agirtemi teka mapa ashir aser manual mesüra practical ajanga technique ka nung mongin akumer, ta ashi.
Laisa parnok dang training agiba mapang angazükba practical skills ji shisa kaa amshitsü ajungshi.
“Kanga nendaka angazükang, nü dak tamang katetang, alizüng tulu yuang aser nai nü tajungtiba ajangzüktettsü,” ta lai ashi.
Okila jembidang United Nations Volunteer, District Youth Coordinator, K.Phyobemo Lotha-i, EBVVS ya Ministry of Youth Affairs and Sports, GoI kübok Nehru Yuva Kendra (NYK) indang kanga tongtibang sentong ka lir, koba ajanga mapa mengui alirtem aser yimtsüngtem nung alirtemi shishilembaba aser skills angazüka rongsenkettsüng jenjang ajungkettsü, ta ashi.
Paisa, training agirtem dang entrepreneurial skills sayutsü, koba ajanga lanurtemi pei dak melung lemtettsü aser akhümket alitsü, ta ashi.
Iba training tetenzük sentong ya Wings Club nungi Senulo leniba nung agi aser Youth Welfare Club nungi Sherenlyo Lorin-i tepela anküp o jembia liasü.
Anogo ka training ya NYK, Ministry of Youth Affairs & Sports GOI-i Youth Welfare Club teyari agia ayongzük.