Dimapur ghonda 24 shibanger; ACAUT züngsem 3 chioktsü akhanger

Dimapur, December 13 (TYO) : December 12 nü police-i ACAUT lennir asem pua aliba chiokang ta takhangba agüja Dimapur nung aliba civil society temi Dimapur nung dokantem ghonda 24 shibangtsü sentong ayongzükogo.
Iba sentongji Mongulbar nikongtsütsü 4:00 ako nungi Bodbar nikongtsütsü 4:00 ako tashi asütsü.
Ghonda 24 tashi dokan aser shishilembadak shibangba mapang gari mesüra nisung senzüsenbongbabo menokdangtsü ta tayongertemi metetdaktsüogo.
Mongulbar nikongtsütsü Dimapur nung aliba civil society tem külem senden ka amendang iba telemtetba agi, ta DUCCF president Tsenthungo Lotha-i ashi.
Ghonda 24 tsüngda ACAUT lennir asem pua alibaji telatetba kecha melii chioktsüla aser iba amaji meinyakra, civil society teloktemi kechi junger ta bilemdir inyaktsü, ta parnokisa metetdaktsü.
Civil society temisa PDS jang ochimeshii amshiba nung tai tonglokja alirtem ajak tangsa tang aputsü atema takhangba agütsüogo.
Tanü Clock tower lenjem nung temulungertem adenshia lungkak aitba sentong ka agitsü merang saka police-i parnok nokdang aser clock tower anasa banner tem yuja aliba agien.
Police-i iba mapa inyakba ya ‘freedom of expression’ anema inyakba lir, ta sentong nung adener kati ashi.
Iba sülen NRL Petrol pump anasa temulungertemi ACAUT züngsemtem mechiok tashi signature campaign ka alitsü sentong tenzük.
Dimapur Police-i metetdaktsür
December 14, 2016 nü Dimapur nung lungkak aitba sentong ka agitsü ta osang angazükogo aser iba dak sendakba nung Dimapur Police-i shishilembar ajak dang pei dokan lapoktsü metetdaktsür, ta ADCP/PRO Dimapur Police sangdong ka nung metetdaktsü.
Benjung mapang shishitepba aser ano Dimapur nungi pila alirtem shishilembai arua aliba atema bilemja dokan ajak lapoktsü metetetdaktsür. Timtem kecha malitsü atema Dimapur Police-i security dak sendakba mapa ajak renema lir aser nisung mesüra telok shingaia tashiyim agi nokdangtsü memelar, ta Dimapur Police-i metetdaktsü.
Ozüng alema tangar kiojen telungi aiba onük nung tai tonglokja apur nisung asem telatetba kecha makai chioktsübaji ozüng inyakyim nung mali, ta Dimapur Police-isa metetdaktsü.
Par asemji okadaki anir oa ken o benok aser okadaki parnok Judicial Custody nung ayutsü atema tetuyuba agütsü. Iba ken o ya tang tebushidak lir aser iba ken o okadaki dang bentettsü. Tai tonglokja alirtemi bail meshitsü akok saka parnok telatetba kecha melii dang chioktsübajibo ozüngi memelar, ta ADCP/PRO Dimapur Police sangdong nung shi lir.