Dimapur Govt. College-i staff ana den tepila sentong agi

Dimapur, Rongjui/September 03 (TYO): Ropngjui/September 1, 2018 nü Dimapur Govt. College-i faculty züngsem tejenpur ana- Wt. Bendangmongla Ao (Vice Principal) aser Chhanda Dutta (HoD, Dept. of Bengali) na den tepila sentong tajung ka ayongzüka agiogo.
Iba sentong ya Dr. Maongsangba, Associate Professor leniba nung agi, aser sentong nung aikati o jembi, ken aten aser Principal Ms. Kavili Jakhalu-i sangro azüng. Shilem agir rongnung faculty züngsemtem, ministerial staff, taoba mapang staff ka, alumni, kaketshirtem aser mapa nungi anisüngzüker alirtem densema liasü.
O jembirtemi Wt. Bendangmongla Ao aser Chhanda Dutta nati kanga nendaka inyakba atema tenüngsang agüja liasü.
Tenaji college tongshitem lir, aser tenati lanur asüba mapang nungi tenzüka tain aküm tashi nung college ajungkettsü atema kanga meranga tenzükogo, aser tenaji tetsü ka amai liasü, ta o jembirtemi tena nem tenüngsang agütsü.
Wt. Bendangmongla Ao ya ochishir, mapa nung kanga tenendak, telok nung kanga melungdoka inyaktetba nisung ka aser teyarinü nisung ka liasü; Chhanda Dutta dak tashi tulu liasü, lai kaketshirtem kanga meim, temang anema alitsüsa libaliro aser Nagaland nung Bengali nunger atema ambassador ka mesüka liasü, ta tena nem tenüngsang agutsü.
Tenati college atema inyakba mapa tajungtem bilemtet aser tena mapa nungi anisüngzükba sülen taküm junga alitsü parnoki tena moaja liasü.
Tena den pei kinüngbutem liasü aser tena nem sempet aika agutsü, aser tenatia college nung tesayurtem nem sempet aguja liasü.
Kasa sentong nung Associate Professor, Wt. Rebainla-i tena nem temeja sarasadem ka sarasademja liasü.