Dimapur-i alo aika bener aodang apu

Diphu, July 9 (Agencies): Karbi Anglong district kübok Rajapathar nung Deobar nikongtsütsü Forest ketdangsertemi bosta 13 nung alo tasüng bener lia apu.
Iba alo tapu dang Assamese oshi nung Bamun Bhekuli ta ajar aser osang tejangja ka angazükba sülen Forest ketdangsertemi NH 36 nung bus gari ka mita reprangdang alotem kümzük.
“Aloji Nagaland kübok Dimapur-i bener aoerba liasü, idakji parnoki alo kanga sapua achir. Dimapur nung alo ka nung sen 50 nungi 60 tashi agi ayoker” ta osang ka ajanga ashi.
“Anogoshia Karbi Anglong district nungi Nagaland state-i arem shiruru aser arem nung adokbaten belener. Nagaland nung arem shiruru teimba ka kanga saputepa achir, ta parnokisa ashi.
Arem shiruru kanga sapua achiba ajanga jenjang tasak agi ayoker. Nagaland nung alo, ozü aser shiruru tilatem jenjang tasak agi yokteper, ta osang ajangasa shisem.