Dimapur II A/C nung common platform sentong agi

Dimapur, Tsüklai 19 (TYO): Tentonü Government Higher Secondary School ground, Dimapur nung 2 Dimapur-II assembly constituency atema common platform sentong ka ayongzüka agi.
Iba sentong ya United colony Council ajanga ayongzük aser Dimapur-II A/C nungi candidate ana- Supolepden Jamir (NDPP) o Dr. S. Amos Lkr (AAP) na aden.
13 buba Nagaland Legislative assembly election atema 2 Dimapur -II nungi candidate asem lir aser parnokji NDPP nungi Supulepden Jamir, NPF nungi Moatoshi Longkumer aser AAP nungi Dr. S. Amos Lkr nungertem lir.
Tanü sentong nung Supu Jamir-i o jembidang, NDPP ya temelenshi bener arutsü atema noktaker ta ashi.
“Ochimashi sen ajanga nenoki mashileni anir toudaktsü saka asen lima nung temelenshi bener arutsü atema ochi nung noktakang” ta paisa ayongzük.
Tanü lennir aikati sen crore aika endoka MLA menden alizüktsü meranger. Süra, parnokji nübor tenzüktsü atema asü mesüra parnok sen bendentsü atema mendenji rakteper? Sen ajanga menden/jenjang alizüktettsü akok saka akhümtsübubo malizüktettsü, ta Supu Jamir-isa shisem.
Nagaland state renloktsü atema nü indang senti vote agüjang aser telemtetba agitsübaji tang ya mapang tajung lir. Asenoki bendanga magütsü tashi asen state merenlokdaktsütettsü, ta paisa ashi.
Dr. Amos-ia election nung aitsü mulungtetba aser alizüngtem indang metetdaktsüdang, tanga constituency temia tatishitsü süa amshitsü atema Dimapur II constituency ya model constituency ka kümdaktsütsü atema lir, ta ashi.
Iba sentong nung United colony council nungi züngsem kati o jembidang, candidate temi common platform nung adentsü atema mapang agütsüba atema pelaba metetdaktsü.