Dimapur, Kma aser Mkg nung Career Guidance sentong agi

Dimapur, Aami/June 02 (TYO): Ao Students Conference (AKM), Ao Students Union Kohima aser Ao Students Union Dimapur-i Divine Bridge Ministries, New Delhi den senteper Career guidance seminar Dimapur nung Monupii/May 29, 2018 nü, Kohima nung Monupii/May 30, 2018 nü aser Mokokchung nung Aami/June 01, 2018 nü ayongzüka agiogo.
“Go Beyond The Visions” omen nung ajemdaker lenla balala nungi shisalen sayurtemi kaketshirtem dak keta aliba tashi aser sempet apir lenmang sayua tesayuba agütsü.
Seminar nung kaketshirtem, talisa HSLC aser HSSLC nung takok angur noklang aika denogo aser parnok tarutsü jenjang shimtsü atema parnok nem career counseling agütsü.
Ajioda kaketshir aikati pei tarutsü nükla nung ajemdaker pei jenjang shidak shimteta tembangogo.
Anogo asemnü tesem balala nung agiba seminar nung shisalen sayurtemji- Dr. Apong Longchar, (DCH,MD) consultant paediatrician, Nikos Hospital, Er. Wapangnaro, SDO, Irrigation & flood control Dept. Kohima, Dr. S.K. Chauhan, Director, Alpine Institute, Dehradun, Ar. Sudhir Acharya, Director, Impact School of Architecture, Bangalore, Dr. Moatemjen, General Surgery, Kohima aser Supongchiten, Director DBM, New Delhi nunger liasü.
Parnoki peipei lenla nung kaketshirtem nem technical teyari agütsüba den külemi kaketshirtemi pei tarutsü jenjang shimba aser temaba shisaliok jenjang shimba nunga yaria liasü.
Item seminar nung kaketshirtem dang MBBS, Engg, business Managements aser allied courses ama maongka balala metetdaktsü.
DBM tentetsang aser Director Supong-i ashiba agi, nisung aikati osang tai agüja kaketshirtem ashiokja sen aika agiba pai ajangshiba sülen pai iba melungtet telok ya tenteta liasü.
Aiben kaketshirtemi memeteti UGC-i recognize masüba Institute nung enroll asür, anungji Divine Bridge Ministries-i kaketshirtemi subject shimba nungi tenzüker institute tapet shimtsü atema counseling agutsür, ta paisa metetdaktsü.