Dimapur kübok Ekhyo Yan nung nisung 114 kümzük

Dimapur, July 21 (TYO): Dhansiri ayong nung tzü tali ayimba ajanga Bodhbar nikongdang nungi Dimapur kübok Ekhyo Yan (Domokhia) yimtsüng tzü agi mobanga lir.
Iba osang angashiba sülen July 20, 2017 nü NSDMA, 32 Assam Rifles, DDMA Dimapur, District Administration aser temeket alirtemi nisung 114 tashi Ekhyo Yan yimtsüng nungi aniteta liasü.
Iba mapaji Commissioner & Secretary NSDMA, Khrienuo Metha, C.O. 32 AR, 6 Sector IGAR North, Col. V.S Shikawar aser OSD, NSDMA, Johnny nungertemi ketdangsüa inyak aser anogo piyong inyaka aruba sülen aonung 7:00 meta tembanga liasü.
Parnok ajakji Government Middle School, Ekhyo Yan nung jenoka lir. Ekhyo Yan nung gaonbora Mensemo Kithan-i ashiba agi, tzümetsüng timtem ajururji kibong 40 shi lir aser parnok teimbaka aonsotsü tsünürtem lir.
Iba lendong nung nisung asüamababo mali saka kiojen, aonsotsü aser shirurutem aika tzümetsüng agi ponger ao, ta Mensemo Kithan-isa shisem.
Iba anogo nung 32 Assam Rifles-i chiyungtsü aser first aid agütsü aser Col. Shikarwar-i ashiba agi, parnoki anogo ishika atema chiyungtsü agütsütsü aser medical unit-ia teyari agütsütsü.
Iba mapang Ekhyo Yan village Council-ia kanga yaritep aser chiyungtsü den tzü tajemtsü agütsü.