Guwahati, June 22 (Agencies) : Dimapur nung lokti kati nisung tepsetba bushisüngdangba osang tatembangba agütsütsü atema Gauhati high court nung division bench kati Central Bureau of Investigation (CBI) nem ita trok talila apuloktsüogo, ta osang kar ajanga metetdaktsü.
Gauhati high court division bench nung chief justice Ajit Singh aser justice Suman Shyam na lir.
CBI-i bushisüngdangba maparen tembangtsü aser final report yanglutsü atema mapang talila meshilok aser iba nungji ajemdaker ita trok apuloktsü ta osang ajanga ashi. Shitakba agibo CBI-i osang agütsütsü atema tatembang anogoji June 9, 2016 nü liasü.
Iba lendong atalokba sülen okadaki CBI dang Nagaland Police ket nungi ken o 4 meshika bushisüngdang asütsü tetuyuba agüja liasü.
“Bushisüngdangba mapang kuli agütsür aser tai tonglokja alirtem dang asüngdangya asütsüsa akümer. Parnok rongnung meta talang pilar alirtem dena lir. Ano, onoki electronic evidence atema expert opinion agitsüla aser iba jagi mapang talila agitsüsa akümer” ta CBI-i mapang meshilokba tezüluba nung shia lir.
Lendong atalokba tesem semdangba sen külemi CBI-i kuli agütsür nisung 150 aser tangar 90 shi dang asüngdangyaogo.
“CBI-i bushisüngdanga aruba nung temulung asür” ta ken o benokertem atema Senior advocate Bhaskar Dev Konwar-ia metetdaktsü.
You must be logged in to post a comment Login