Dimapur Mission school nungi takok angurtem nem tetushi agütsü

Monupii/May 25, 2018 nü Dimapur Ao Baptist Arogo (DABA) town fellowship nung tawa HSLC & HSSLC 2018 tatidang nung Dimapur Mission Higher Secondary School (DMHSS) nungi takok angur kaketshirtem nem tetushi agütsüba sentong nung HSLC topper, Sangerbenla Tzudir, subject toppers, School Governing Board aser tesayurtem külemi tangokba noksa nung angur. Dimapur, Monupii 25, 2018.

Dimapur, Monupii/May 25 (TYO): Tanü Dimapur Ao Baptist Arogo (DABA) town fellowship nung HSLC & HSSLC 2018 tatidang nung Dimapur Mission Higher Secondary School (DMHSS) nungi takok angur kaketshirtem nem tetushi agütsüba sentong tajung ka agiogo.
Kr. Sangerbenla Tzudir-i Dimapur Mission Higher Secondary School (DMHSS) atema otsü tasen ka yanglua Nagaland Board of School Education-i achaayanga agiba HSLC 2018 tatidang nung tang mezüng iba school nungi 6th position nung takok ngua liasü.
HSLC 2018 tatidang nung iba school nungi tatidang agütsür ajaki (100%) takok ngua liasü, aser tesüiba kümtem nunga kasa jenjang nung takok nguogo.
HSSLC 2018 tatidang nunga kaketshir 107 nungi parnok 97-i takok angu aser parnok rongnung kaketshir ponguibo distinction nguogo.
Takok angur kaketshirtem nem tetushi agütsüba sentong nung jembidang School Governing Board Chairman, Wb.K. Temjen Jamir-i, takok angubaji Tsüngrem temoatsü ajanga lir, iba denji külemi tesayurtem, tsüraburtem aser kaketshirtemi meranga inyakba ajanga lir, ta metetdaktsü.
Paisa, “Tanü iba takok anguba ya ajanga, tanga school temi inyaktetra asenokia inyaktettsü ta kuli sayur,” ta metetdaktsü.
Kaketshirtem ayongzüka Wb.Temjen Jamir-i parnok dang temaba jenjang nung azüngtsü atema lenmang shimdang kanga shisa kaa telemtetba agitsü ajungshiba den külemi taküm nung takok angutsü atema sadoksadoka malitsü saka timtem arema inyaktsü ajungshi.
School governing body tenüng nungi Wb.Temjen-isa DMHSS nung tesayurtem, taoba mapang school principal tem, DABA, school ketdangsertem aser tsüraburtemi lenla balala ajanga nungita yariba atema pelaba lemsatep.
Paisa, iba takok anguba ajanga melung sür malitsü saka tarutsü nung ano iba dang nungi jenjang tajungtiba ajangzüktettsü atema ayongzük.
Taküm küm asoshi Excellency award ji, HSLC 2018 tatidang nung jenjang 6buba nung takok angula, Sangerbenla Tzudir nem agütsü, iba dak alia la nem senpet 25,000 den kulikaket tajung ka agütsüogo.
Kasa sentong nungsa HSSLC nungi (subject toppers) pongu aser HSLC nungi parnok 16 shia nem senpet 2000 agutsü. Iba dak alia school governing board-i tesayurtem nema tetushi agütsüogo.
Iba sentong nung jembidang topper, Sangerbenla Tzudir-i, tesayurtemji takok tongshi lir, ta shia kaketshirtem nükjidong atongtsü atema junga sayutetba atema tesayurtem dang pelaba lemsatep.
Laisa school governing board aser school-i tetushi agütsüba sentong ayongzüka katsüba atema pelaba shisem.
School Principal, Alemtushi Imchen-i school indang osang tongmelang agi metetdaktsü; taoba DABA pastor, Rev. Dr N Tzudir aser taoba mapang DMHSS Governing Board Chairman, Lanulemba Jamir natia kaketshirtem ajungshia jembi.
Sentong nungsa DABA pastor, Rev. I Wati-i DABA tenüng nung jembi aser Dimapur Ao Baptist Arogo (DABA) nungi pastor temi meshiteta sarasademtsü.
Sentong nung Class 12 nung azünger kaketshirtemi ken tajung ka tena liasü.