Dimapur, Mokokchung & Tuensang nung IPPI round 1 buba agi

Dimapur, January 29 (TYO) : Deobarnü District Hospital Dimapur nung Deputy Commissioner, Kesonyu Yhome-i Intensive Pulse Polio Immunization (IPPI) tenzüktsü.
Iba sentong nung Kesonyu Yhome-i tanur ka nem polio mozü jemdaktsüba sülen tesem ajak nung polio jemdaktsüba mapa tenzükja liasü.
Iba mapa kübok Dimapur district nung tanur 53,167 tashi ayimjemtsü atema polio booths 512 lapok aser ano mobile team aika tenteta mapa nungloktsüogo.
Dimapur Deputy Commissioner, Kesonyu Yhome-i sentong nung polio ajemtsü indang onük jembidang, medical staff aser allied department tem den volunteer temi shilem agiba ajanga polio immunization programme kanga takok ngua agiteter, ta ashi.
Sentong nung Dr. Lanuakum, DPO (UIP/RCH)-ia ashiba agi, 2014 nungi WHO-i India nung polio maliba ta kuli agütsüogo, saka Dimapur ya bendang linüktem nungi senzüsenbongertem kanga süiba tongti tesem ka lir aser iba jagi asen district aser linük asoshi lendong bener arutsü ana nung lir.
Anungji, asenoki district nung polio anema mapa inyaktsübaji kanga nüngdak, ta paisa ashi.
Iba sentong nung Dr. Kinimi, Chief Medical Officer, Dr. CW Tungoe, Medical Superintendent, DHD, Dr. Antoly, Deputy Chief Medical Office, Programme Officers, Nursing Superintendent, Projector Officer (UNDP) aser District Hospital & CMO Dimapur kübok doctor aser staff tem aden.
January 29, 2017 nü Mokokchung District nung IPPI 1 buba round agiogo. Iba mapa ya ‘Fulfill our promise’ omen nung ajemdaker inyak.
Imlong Place nung sentong tenzükba mapang Dr. S.S. Akaba Longchar-i tajungshi o jembi aser pai polio mezüngbuba drop jemdaktsü.
Polio ya menatepba tashidak ka lir aser iba ya virus ka ajanga adokdaktsür. Arishi küm 5 teküpok tanurtem dak virus ya melamela atemer, anungji tanur shia nem polio drop ana jemdaktsütsübaji kangasa tongtipang lir, ta Dr S.S. Akaba-i ashi.
India sorkari linük tesem ajungalen polio samatsütsü atema mapa meranga inyaker. Polio tashidak maliba linük ka kümdaktsütsü atema department tem aser NGO tem yaritepa inyaktsüla, ta paisa ayongzük.
Dr Temsuyanger DPO(RCH&UIP)-i senotsü peria meliaka tanü sentong takok ngua ayongzüka agiba atema pa nem tenüngsang agütsür, ta CMO-isa ashi.
Iba sentong nung mendenji Dr Temsuyanger DPO (RCH & UIP) liasü aser pai ashiba agi tanü polio majemertem asoshi January 30 & 31, 2017 anogotem kilen shia sema senzütsü.
Iba sentong nung Dr Kibangkumba Dy.CMO, UNDP, Red Cross society, Rotary Club, NGOs aser DIO nungi staff tem aden.
January 29, 2017 nü Tuensang District Health Society-i Pulse Polio mezünguba round agiogo ta CMO Dr. T.Pangjung Sangtam-i sangdong ka nung metetdaktsü.
Tuensang district nung Deputy Commissioner Alemjongshi (NCS) aser DPO (UIP&RCH) Dr.Temsu Longchar nati sentong tenzüktsü.
Iba mapa atema department-i vaccinators 1,250, block 8 nung Supervisors 46 mapa nungloktsüogo aser parnoki arishi küm 5 ser teküpok aliba tanur 27,552 shi nem polio mozü jemdaktsütsü, ta Tuensang CMO-isa sangdong nung shia lir.
Parnokisa Tuensang district nung polio booths 267 lapokogo. Yaritepba department tem aser public-i yaritepba atema pelar, ta paisa shisem.