Dimapur Municipal Counci-i terenlok mapa aika inyaker : Dr. Maongwati Aier

Dimapur, November 18 (TYO) : Nagaland nung terenlok mapa inyakba tsütsü reprangdangra, municipal tajungtibaji Dimapur Municipal Council (DMC) lir, ta Bodbarnü Municipal Affairs, Secretary, Dr. Maongwati Aier (IAS)-i ashi.
Nagaland nung municipal aser town councils 11 lir aser Dimapur nung aliba sensotemi saru shitak agütsüba ajanga Dimapur Municipal Council-i terenlok mapa jenti inyaker. Iba nungi tatishitsü agia tanüngba municipal aser town council kübok alirtemi saru shitak agütsütsü ayongzüker, ta Bodbarnü Residency colony nung culvert semzükba sentong nung Dr. Maongwati-isa metetdaktsü.
State sorkari tang aliba DMC office kimung nung office tasen yanglutsü mulunga agizükogo aser iba ki tasenba nung parking facility, shopping malls, office amala alitsü, ta paisa shisem.
Iba sentong nung DMC CEO, H Atokhe Aye-i o jembidang, Dimapur nung alirtemi DMC yaritsü ayongzük.
October 2 nü Swachh Bharat tenzükba nüngtem nung DMC-i jila kübok tongtipang tesemtem nung awareness maparen inyakogo aser maneni tuluba nung inyaktsü, ta paisa metetdaktsü.
Tanü culvert semzüktsübaji Landmark, Kyong aser Residency colony atema tongti gari lenmang nung lir aser iba ya DMC-i acha-ayanga yanglu.